ఎంతో ఆనందంగా, సంతోషంగా తమ జీవితాన్ని గడపాల్సిన పిల్లలు... స్కూళ్లలో టీచర్లు ఇచ్చే హోంవర్క్ వల్లగానీ, పరీక్షల సమయంలోగానీ ఎక్కువ ఒత్తిడి, మానసిక ఆందోళనకు గురవుతుంటారు. అటువంటి సమయాల్లో పిల్లలు తీవ్రంగా తమలోతాము ఎంతగానో బాధపడుతుంటారు. ఈ సమస్య కేవలం పిల్లలకే కాదు.. పెద్దలకు కూడా వుంటుంది. 

సాధారణంగా కొంతమంది పిల్లలు టీచర్లు చెప్పే పాఠాలను ఏకాగ్రతగా విని అర్థం చేసుకోగలరు. అదేవిధంగా పరీక్షల సమయాల్లో అన్నివిధాలుగా తమ ప్రణాళికలను సిద్ధం చేసుకుని.. అంటే ముందుగానే అన్ని పాఠాలను చదువుకుని తిరిగి వాటిని రివిజన్ చేసుకుంటారు. దీంతోవారు మంచిమార్కులు కూడా సంపాదించుకుంటారు. 

మరికొంతమంది పిల్లలు టీచర్లు చెప్పే పాఠాలమీద గాని, చదువుకోవడంలోగాని తమ ఏకాగ్రతను కేటాయించలేకపోతారు. ఫలితంగా వారు ఫెయిల్ అవ్వడమే కాకుండా మానసిక ఒత్తిడికి గురవుతుంటారు. కొన్ని సందర్భాలలో పిల్లలు ఆత్మహత్యలు కూడా చేసుకోవచ్చు. 

ఇటువంటి విషయాలలో తల్లితండ్రులు ముందుగానే జాగ్రత్తలు తీసుకోవాలి. పిల్లలు చదువుకోవడంలో ఇబ్బంది పడితే వారిని అనవసరంగా ఒత్తిడికి గురి చేయకుండా వారికి తగినంత సహాయం చేయాలి. వారి చదువుకు అంతరాయం కలగకుండా మంచి మార్కులతో పాస్ అవ్వాలంటే.. ముందుగా వారికి చదువు మీద ఏకాగ్రత కలిగేలా చేయాలి. 

ప్రస్తుతకాలంలో పిల్లలు జ్ఞాపకశక్తిని, వారి ఏకాగ్రతను, శక్తిని పెంచే ఆహారపదార్థాలు ఎన్నో వున్నాయి. అదేవిధంగా ప్రకృతిలో కూడా ఎన్నోరకాల పోషకవిలువలు కలిగిన ఆహార పదార్థాలు కూడా మనకు అందుబాటులో వున్నాయి. పోషకపదార్థాలు తీసుకోవడం వల్ల పిల్లల్లో మెదడు చురుకుగా, ఉత్తేజంగా పనిచేయడంతోపాటు వారిలో ఉత్సాహాన్ని పెంచుతుంది. సమయానుకూలంగా పోషకాపదార్థాలు ఇవ్వడం వల్ల వారు అన్ని కార్యకలాపాలలో పాల్గొనడానికి ఆసక్తిని చూపుతారు. 

పిల్లల్లో ఏకాగ్రతను పెంచే పోషకపదార్థాలు ఏవో మనం ఒకసారి తెలుసుకుందాం... 

వాల్ నట్స్ : ఇందులో మెదడు ఏకాగ్రతను పెంచే యాంటీ ఆక్సిడెంట్స్ పుష్కలంగా లభిస్తాయి. మెదడులో ఫ్రీరాడికల్ డ్యామేజ్ కు కారణమయ్యే కొన్ని బ్రెయిన్ సెల్స్ విడుదల అవుతాయి. అయితే ఈ వాల్ నట్స్ వాటికి పూర్తిగా వ్యతిరేకంగా పోరాడి.. ఏకాగ్రతను పెంచే పెంపొందిస్తుంది. దీనిని ఒక్కసారి క్షుణ్ణంగా పరిశీలిస్తే.. ఒక మెదడు ఆకారంలో వుంటుంది. 

చాక్లెట్స్ : ఇది పిల్లలకు ఎంతో ఇష్టమైన పదార్థం. ఇందులో కెఫిన్ అనే పోషకం వుండటం వల్ల పిల్లలు ఒత్తిడికి గురికాకుండా వుంటారు. ఇది ఒక బ్రెయిన్ ప్రొటెక్టింగ్ యాంటీఆక్సిడెంట్ ఫుడ్ గా పేరు పొందింది. 

బెర్రీస్ : బ్లూ బెర్రీస్ ఎంతో ఉత్తమమైన బ్రెయిన్ ఫుడ్. ఇది ఆక్సిడేటివ్ స్ట్రెస్ నుండి మనకు రక్షణ కల్పిస్తుంది. అంతేకాదు... పిల్లల్లో లర్నింగ్ కెపాసిటీని, మోటార్ స్కిల్స్ ను పెంచడంలో ముఖ్యపాత్ర పోషిస్తుంది. 

ఆకుకూరలు : ఆకుకూరల్లో ముఖ్యంగా విటమిన్ ఇ పుష్కలంగా వుంటుంది. ఇది అభిజ్ఞా ప్రక్రియను మరియు బ్రెయిన్ టిష్యూలను ఏర్పరుస్తుంది. ఫలితంగా పిల్లలకు చదువుమీద ఏకాగ్రతను పెంచడంతో ఇది సహాయపడుతుంది. ఇందులో వుండే రసాయనాలు మెదడును ఎల్లప్పుడూ రీఫ్రెష్ చేస్తుంటుంది. 

క్యారెట్స్ : తాజాగా వుండే క్యారెట్స్ తీసుకోవడం వల్ల ఇందులో వుండే లూటియోలిన్ మెదడులో ఇన్ల్ఫమేషన్ తగ్గించి.. మెమొరీని రీస్టోర్ చేయడంలో సహాయపడుతుంది. 

చేపలు : చేపలో మెదడుకు సంబంధించిన విటమిన్స్ ఎంతో పుష్కలంగా లభిస్తాయి. అంతేకాదు.. ఇందులో వుండే ఒమేగా 3 ఫ్యాటీ ఆసిడ్స్ మెదడుకు కావల్సినంత శక్తిని అందించి, ఉత్తేజితంగా వుండడంలో సహాయపడుతుంది. 

తృణధాన్యాలు : ఇవి పిల్లల్లో ఏకాగ్రతను పెంచడంలో ముఖ్యపాత్రను పోషిస్తాయి. ప్రతిరోజూ లేవగానే బ్రేక్ ఫాస్ట్ లో వీటిని తీసుకోవడం ఎంతో మంచిది. 

సన్ ఫ్లవర్ సీడ్స్ : ఇందులో డొపమైన్ చాలా ఎక్కువ మోతాదులో వుంటుంది. అందులోవుండే బ్రెయిన్ కెమికల్స్... మోటివేషన్, ఏకాగ్రతను పెంచడంలో సహాయపడుతాయి. 

బీన్స్ : ఇవి పిల్లల్లో ఎనర్జీ లెవల్ ను పెంపొందించడంలో ఎంతో ముఖ్యమైంది. ఇవి ప్రతిరోజూ పిల్లలకు ఇస్తే ఎంతో ఉత్తమమైన నిర్ణయం. 

ఫ్లాక్స్ సీడ్స్ : ఇవి కూడా సన్ ఫ్లవర్ సీడ్స్ లాగే పిల్లల్లో ఏకాగ్రతను పెంపొందించడంలో ఎంతో మేలు చేస్తాయి. ఇందులో మెగ్నీషియం, విటమిన్ బి, ఒమేగా 3 ఫ్యాటీ యాసిడ్స్, ఫైబర్ వంటివి పిల్లల్లో మెంటల్ క్లారిటీని మెరుగుపరుస్తుంది. 

అరటిపండ్లు : ఇవి సహజంగా విటమిన్ బి5, పొటాషియం ఎక్కువ మోతాదులో కలిగి వుంటాయి. దీంతో శరీరంలో సెరోటినిన్, న్యూరోపైన్ప్రిన్ మరియు డొపమైన్ ను ఉత్పత్తి చేయడంలో సహాయపడుతాయి. ఈ మూడు అంశాలు పిల్లల్లో ఏకాగ్రతను పెంచడానికి, ఉత్తేజితంగా వుంచడానికి ఎంతో తోడ్పడుతాయి. 

గ్రీన్ టీ : ఉదయాన్నే లేవగానే పిల్లలకు ప్రతిరోజూ గ్రీన్ టీ ఇవ్వడం ఎంతో ఉత్తమమైంది. ఎందుకంటే.. రీన్ టీలో వుండే సప్లిమెంట్స్, ఫ్లెవనాయిడ్స్ పిల్లల్లో ఏకాగ్రతను మరియు మెమరీని పెంచడానికి సహాయపడుతాయి.