రెజ్లింగ్ పోటీల్లో మెరిసిన తెలంగాణ అమ్మాయిలు!

Posted: 10/21/2014 02:51 PM IST

Telangana girls won bronze medals in wrestling game

ప్రస్తుత క్రీడారంగంలో పురుషులకంటే మహిళలే మంచి ప్రదర్శనను కనబరుస్తున్నట్లు తెలుస్తోంది. ఆమధ్య జరిగిన ఆసియా క్రీడల్లో కూడా చాలావరకు మహిళా క్రీడాకారిణులే తమ ప్రతిభతో పతకాలు గెలుచుకుంటూ భారత గౌరవాన్ని నిలబెట్టడంలో కీలకపాత్రను పోషించారనడంలో ఎటువంటి సంశయమూలేదు. ఆ క్రీడల్లోనే తెలుగమ్మాయిలు కూడా తమ సత్తా చాటారు. ఒక్కొక్క విభాగంలో ఒక్కొక్కరు జట్టు విజయంలో తమవంతు కృషి చేశారు. వారిని స్ఫూర్తిగా తీసుకునే జూనియర్లు కూడా క్రీడారంగంలో దూసుకుపోతున్నారని తెలుస్తోంది. తాజాగా మరో ముగ్గురు తెలంగాణ అమ్మాయిలు రెజ్లింగ్ పోటీలో అద్భుతంగా ప్రదర్శించి, పతకాలు నెగ్గారు.

జాతీయ స్కూల్ గేమ్స్‌లో భాగంగా నిర్వహించిన రెజ్లింగ్ పోటీల్లో తెలంగాణ అమ్మాయిలు మెరిశారు. మధ్యప్రదేశ్‌లోని ఉజ్జయినిలో జరిగిన అండర్-19 బాలికల రెజ్లింగ్ చాంపియన్‌షిప్‌లో ఎస్. శ్యామల, పి.శిరీష, ఎం.మౌనిక తమ ప్రతిభతో అద్భుతంగా ప్రదర్శించి.. ప్రత్యర్థులను దాటుకుంటూ చివరికి కాంస్య పతకాలు గెలుపొందారు. ట్రినిటీ జూనియర్ కాలేజికి చెందిన శ్యామల 51 కేజీల విభాగంలో, శిరీష 55 కేజీల విభాగంలో కాంస్యాలు గెలిచారు. అలాగే రీజినల్ స్పోర్ట్స్ స్కూల్‌కు చెందిన మౌనిక 59 కేజీల విభాగంలో కాంస్యం నెగ్గింది. ఇంకొక ముఖ్యమైన విషయం ఏమిటంటే... ఈ ముగ్గురు కరీంనగర్ జిల్లాకు చెందినవారే కావడం విశేషం.

ఈ విధంగా పతకాలు గెల్చుకున్న ఈ ముగ్గురు అమ్మాయిలను తెలంగాణ పాఠశాల విద్యా జాయింట్ డెరైక్టర్ పి.వి.శ్రీహరి సోమవారం తన చాంబర్‌లో అభినందించారు. రాష్ట్ర స్కూల్ గేమ్స్ కార్యదర్శి కె.రామ్‌రెడ్డి, హైదరాబాద్ జిల్లా స్కూల్ గేమ్స్ కార్యదర్శి ఎల్.రాజేందర్ ప్రసాద్‌లు కూడా వారి ప్రదర్శనను మెచ్చుకున్నారు. రాష్ట్ర రెజ్లింగ్ కోచ్ శ్రీనివాస్, జట్టు కోచ్ వాణిశ్రీ, మేనేజర్ బి.లక్ష్మణ్ తదితరులు ఈ కార్యక్రమంలో పాల్గొన్నారు. ఈ ముగ్గురు అమ్మాయిలు తెలంగాణ రాష్ట్ర గౌరవాన్ని నిలబెట్టారని వారు ఆనందాన్ని వ్యక్తం చేస్తూ వారిని పొగడ్తలతో ముంచెత్తారు.