పెళ్లికిముందే ఆరాటపడుతున్న దినేష్-దీపిక జోడీ!

Posted: 10/09/2014 01:31 PM IST

Cricketer dinesh karthik clarifies about his marriage with squash star deepika pallikal

టీమిండియా క్రికెటర్ దినేష్ కార్తీక్, స్క్వాష్ స్టార్ దీపిక పల్లికల్ ఇద్దరికీ గతేడాదే నిశ్చితార్థం జరిగిన విషయం అందరికీ తెలిసిందే! కానీ ఇంతవరకు వీరిద్దరూ పెళ్లి మాత్రం చేసుకోలేదు. అయినప్పటికీ భార్యాభర్తల్లాగే వారిద్దరూ చట్టాపట్టాలేసుకుని తిరుగుతున్నారు. తీరిక సమయం దొరికినప్పుడల్లా విదేశాలకు వెళ్లడం, పార్టీలు - ఫంక్షన్లకు అటెండ్ అవుతూ స్పెషల్ అట్రాక్షన్ గా నిలుస్తున్నారు. అందరిచేత చూడముచ్చట జంటగా అప్పుడే పేరు సంపాదించుకున్నారు. అయితే తమ పెళ్లి ఎప్పుడు జరుగుతుందన్న విషయాన్ని మాత్రం వీరు ఇంతవరక బహిరంగంగా ప్రకటించిన సందర్భాలు అస్సలు లేవు. అయితే తాజాగా అందుతున్న సమాచారల ప్రకారం.. వీరిద్దరూ పెళ్లి చేసుకోవాలంటూ తెగ ఆరాటపడుతున్నారని తెలుస్తోంది. వచ్చే ఏడాదిలో వీరి పెళ్లి జరగవచ్చుననే వార్తలు వస్తున్నాయి.

ఇదే విషయమై క్రికెటర్ దినేష్ కార్తీక్ మాట్లాడుతూ.. ‘‘నేను కొద్దికాలంగా పెళ్లి చేసుకోవడానికి సిద్ధంగా వున్నాను. ఆమె కూడా ఆరంభం నుంచే వివాహానికి సిద్ధంగా వుంది. అయితే కొన్ని అనివార్య కారణాల వల్ల ఇద్దరూ పెళ్లి గురించి ఆలోచించలేకపోయాం. అయితే ఇప్పుడు మాకు ఒకరిపై ఒకరికి చక్కని అవగాహన ఏర్పడింది. పెళ్లికి మేమిద్దరం సిద్ధంగానే వున్నాం. అందుకు ఎటువంటి సందేహం లేదు’’ అంటూ పేర్కొన్నాడు. దీంతో వారిద్దరు 2015 ద్వితీయార్థంలో పెళ్లి చేసుకోవాలని నిర్ణయించుకున్నారని తెలిసింది. ఏదేమైనా.. పెళ్లికి ముందే ఈ జంట అందరి దృష్టిని బాగానే ఆకర్షించిందని విశ్లేషకులు చెప్పుకుంటున్నారు. త్వరలోనే వీరి పెళ్లి జరగాలని అందరూ ఆశిస్తున్నారు.