టీమిండియాకు దెబ్బ మీద దెబ్బ.. షాకిచ్చిన ఐసీసీ

Posted: 01/24/2022 07:11 PM IST

Team india fined 40 percent of their match fees after losing third odi against sa

టీమిండియా జట్టు దెబ్బ మీద దెబ్బ తగులుతోంది. దక్షిణాఫ్రికా పర్యటనలో ఓ వైపు టెస్టు సిరీస్ చేజార్చుకున్న టీమిండియా.. వన్డే సిరీస్ ను క్లీస్ స్వీప్ అయ్యింది. దీంతో ఇంటా బయట విమర్శలతో కొలుకోలేని స్థితిలోకి జారుకున్న టీమిండియాకు మరో ఎదురుదెబ్బ తగిలింది. వన్డే సిరీస్‌లో ఘోర పరాభవాన్ని మూటగట్టుకున్న టీమిండియా మూడవ వన్డేలో నువ్వా-నేనా అన్నట్లు తలపడినా.. ఉత్కంఠగా సాగిన ఈ వన్డేలోనూ దక్షిణాఫ్రికా ఆటగాళ్లు రాణించి కేవలం 4 పరుగుల తేడాతో రాహుల్ సేన నుంచి విజయాన్ని లాక్కున్నారు. దీంతో కనీసం పరుపు నిలుపుకుందామనుకున్న మ్యాచ్ లోనూ ఓటమిపాలు కావడంతో వైట్‌వాష్‌ తప్పలేదు.

ఇక ఈ ఓటమి భారంతో నిరాశలో ఉన్న టీమిండియాకు మరో షాక్‌ తగిలింది. స్లో ఓవర్‌ రేటు కారణంగా రాహుల్‌ సేనకు ఐసీసీ భారీ జరిమానా విధించింది. మ్యాచ్‌ ఫీజులో 40 శాతం కోత పెట్టింది. ఐసీసీ నియావళిలోని ఆర్టికల్‌ 2.22 ప్రకారం... నిర్దేశిత సమయంలో వేయాల్సిన ఓవర్ల కంటే తక్కువ ఓవర్లు వేసిన కారణంగా ఈ మేరకు ఫైన్‌ విధించినట్లు పేర్కొంది. కాగా దక్షిణాఫ్రికా పర్యటన టీమిండియాకు చేదు అనుభవాన్ని మిగిల్చింది. టెస్టు, వన్డే సిరీస్‌లో కలిపి మొత్తంగా ఆరు మ్యాచ్‌లు ఆడగా... టీమిండియా కేవలం ఒక్క టెస్టు మాత్రమే గెలవడం గమనార్హం. దీంతో హెడ్‌కోచ్‌గా రాహుల్‌ ద్రవిడ్‌కు, రోహిత్‌ గైర్హాజరీలో తొలిసారి వన్డేలకు కెప్టెన్‌గా వ్యవహరించిన కేఎల్‌ రాహుల్‌కు భంగపాటు తప్పలేదు.