అన్నపూర్ణ స్టూడియోలో కోహ్లీ.. అఖిల్ తో ముచ్చట్లు

Posted: 10/10/2018 06:33 PM IST

టీమిండియా కెప్టెన్ హైదరాబాద్ పర్యటనలో భాగంగా నటుడు అక్కినేని అఖిల్ తో ముచ్చటించారు. హైదరాబాద్ వేదికగా ఉప్పల్ లోని రాజీవ్ గాంధీ క్రికెట్ స్టేడియంలో విండీస్ తో రెండో టెస్టు సందర్భంగా హైదరాబాద్ కు చేరుకున్న విరాట్‌ కోహ్లీ.. నేరుగా అన్నపూర్ణ స్టూడియోస్ లోకి వెళ్లి సందడి చేశారు. రెండో టెస్టు నిమిత్తం కోహ్లీ తన సతీమణి, బాలీవుడ్ నటి అనుష్క శర్మతో కలిసి హైదరాబాద్‌ చేరుకున్నారు. ఈ నేపథ్యంలో కోహ్లీ అన్నపూర్ణ స్టూడియోస్‌కు వచ్చారు.

అన్నపూర్ణ స్టూడియోస్ లో ఆయనపై ఓ ప్రకటనను చిత్రీకరించనున్నట్లు సినీ వర్గాలు సోషల్ మీడియా ద్వారా వెల్లడించాయి. ఈ చిత్రీకరణకు సమయం పట్టే సందర్భంలో విరాట్ కోహ్లీ, అక్కినేని అఖిల్ తో కలిసి సరదాగా ముచ్చటించారు. వీరిద్దరు కరాచలనం చేసుకున్న ఫోటోలతో పాటు.. ముచ్చటిస్తున్న ఫొటోలు నెట్టింట్లో విపరీతంగా చక్కర్లు కొడుతున్నాయి. శుక్రవారం నుంచి రెండో టెస్టు ఉప్పల్‌ స్టేడియంలో ప్రారంభంకానుంది. ఇందుకోసం టీమిండియా, వెస్టీండీస్ జట్లు ఇప్పటికే హైదరాబాద్ చేరకున్నాయి.

మరోపక్క విరాట్‌ భార్య అనుష్క ‘సుయీ ధాగా’ చిత్రంతో మంచి విజయం అందుకున్నారు. ప్రస్తుతం ఆమె చేతిలో సినిమాలు ఏమీ లేకపోవడంతో భర్తతో కలిసి మ్యాచ్‌ను వీక్షించేందుకు హైదరాబాద్‌కు వచ్చారు. అనుష్క నటించిన ‘జీరో’ చిత్రం నవంబర్‌లో ప్రేక్షకుల ముందుకు రాబోతోంది. షారుక్‌ ఖాన్‌ ప్రధాన పాత్రలో నటించిన ఈ చిత్రంలో కత్రినా కైఫ్‌ మరో కథానాయికగా నటించారు. ఆనంద్‌ ఎల్.రాయ్‌ ఈ చిత్రానికి దర్శకత్వం వహించారు.