ముందుగానే గౌరవప్రదంగా తప్పుకున్న పవార్

Posted: 12/17/2016 07:39 PM IST

క్రికెట్‌ సమూల ప్రక్షాళనకు ఉద్దేశించి దేశ సర్వోన్నత న్యాయస్థానం సుప్రీంకోర్టు ఏర్పాటు చేసిన జస్టిస్‌ లోధా కమిటీ సిఫారసుల అములు నేపథ్యంలో క్రమంగా బిసిసిఐ సహా రాష్ట్ర సంఘాలలో కదలికలను తీసుకోస్తున్నాయి. ఈ నేపథ్యంలో రాజకీయ కురువృద్ధుడు, ఎన్సీపీ అధినేత శరద్‌పవార్‌ (76) ముంబై క్రికెట్‌ సంఘం (ఎంసీఏ) అధ్యక్ష పదవి నుంచి తప్పుకొన్నారు. జస్టిస్ లోధా కమిటీ సిఫార్సులు అమలలో భాగంగా ఆయన ఈ నిర్ణయాన్ని తీసుకున్నారు. బీసీసీఐలో, దాని అనుబంధ యూనిట్లలోని బాధ్యులు, అధికారులకు వయస్సు పరిమితి, కాలపరిమితి ఉండాలని లోధా కమిటీ సిఫారసు చేసింది.

ఈ సిఫారసు అమలైతే.. శరద్‌ పవార్‌పై వేటు పడే అవకాశముంది. ఈ నేపథ్యంలోనే ఆయన స్వచ్ఛందంగా తప్పుకొన్నట్టు భావిస్తున్నారు. రాజకీయాలతోపాటు క్రికెట్‌ అనుబంధం కొనసాగిస్తున్న పవార్‌ 2005 నుంచి 2008 వరకు బీసీసీఐ అధ్యక్షుడిగా సేవలు అందించారు. 2010-12 వరకు అంతర్జాతీయ క్రికెట్‌ మండలి (ఐసీసీ)కి ప్రెసిడెంట్‌గా ఉన్నారు. 2015 జూన్‌లో ఎంసీఏ అధ్యక్షుడిగా మూడోసారి ఎన్నికయ్యారు. అయితే, 70 ఏళ్లు దాటిన వాళ్లు క్రికెట్‌ సంఘాల్లో ఉండరాదని లోధా కమిటీ సిఫారసు చేసిన సంగతి తెలిసిందే.