కరేబియన్ గడ్డపై సత్తా చాటిన స్పిన్నర్ల త్రయం

Posted: 07/15/2016 08:03 PM IST

వెస్టిండిస్ బోర్డు ప్రెసిడెంట్ ఎలెవెన్‌తో జరుగుతోన్న చివరి వార్మప్ మ్యాచ్‌లో భారత స్పిన్నర్లు రాణించారు. దీంతో ముందుగా బ్యాటింగ్ చేసిన బోర్డు ప్రెసిడెంట్ జట్టు 180 పరుగులకే కుప్పకూలింది. ఈ మ్యాచ్‌లో భారత స్పిన్ త్రయం అశ్విన్, అమిత్ మిశ్రా, జడేజా రాణించారు. అశ్విన్ 62 పరుగులిచ్చి 3 మూడు వికెట్లు తీయగా, మిశ్రా 45 పరుగులకు 2 వికెట్లు పడగొట్టాడు. రవీంద్ర జడేజా మాత్రం అత్యద్భుతంగా రాణించాడు. కేవలం 13 ఓవర్లు వేసి 16 పరుగులు మాత్రమే ఇచ్చి 3 వికెట్లు తీయడం విశేషం.

తొలి రోజు ఆట ముగిసే సమయానికి భారత జట్టు 3 వికెట్లు కోల్పోయి 93 పరుగులు చేసింది. కేఎల్ రాహుల్ 30 పరుగులతో క్రీజులో ఉన్నాడు. తొలి రోజు చివరి బంతికి చటేశ్వర పుజారా అవుటయ్యాడు. ఓపెనర్లు మురళీ విజయ్ 23 పరుగులు చేయగా, శిఖర్ ధావన్ 9 పరుగులకే వెనుదిరిగాడు. ఈ మ్యాచ్‌లో భారత బౌలర్ రూకీ శార్ధుల్ థాకూర్ (1/24) ఆకట్టుకున్నాడు. విండిస్ బౌలర్లలో జాసన్ డేవ్స్ 15 పరుగులిచ్చి ఒక వికెట్ తీయగా, కార్న్‌వాల్ 17 పరుగులచ్చి ఒక వికెట్ పడగొట్టాడు.