ఐపిఎల్ లో సొంత టీంతో ధోనీ

Posted: 11/11/2015 05:23 PM IST

టీమిండియా కెప్టెన్ ఎం ఎస్ ధోనీ కొత్త అవతారం ఎత్తనున్నారు. మిస్టర్ కూల్ గా టీం ను ఎలా డీల్ చెయ్యాలో ధోనీకి తెలిసినంతగా.. ఏ కెప్టెన్ కు తెలియదు అని చాలా మంది నమ్ముతారు. అయితే తాజాగా ఐపిఎల్ లో సొంతంగా టీంను కొనుక్కోవాలని చూస్తున్నట్లు తెలుస్తోంది. టీమిండియా వన్డే జట్టు కెప్టెన్ మహేంద్ర సింగ్ ధోని త్వరలో బాస్ గా మారబోతున్నాడు. చెన్నై సూపర్ కింగ్స్ తరపున ఏడేళ్ల పాటు కెప్టెన్-గా ఆడిన మహీ ఇప్పుడు ఆ జట్టుపై నిషేధం ఉండటంతో ఐపీఎల్-లో ఒక జట్టును కొనేందుకు రెడీ అయ్యాడు. ఈ సీజన్ ఐపీఎల్ లో రెండు కొత్త జట్లకు బిడ్స్ వేయాలని ఐపీఎల్ గవర్నింగ్ కౌన్సిల్ గతంలోనే నిర్ణయించింది.

చెన్నై సూపర్ కింగ్స్ జట్టుపై రెండేళ్ల నిషేధం ఉండటంతో ఆ జట్టు కెప్టెన్ మహేంద్ర సింగ్ ధోని మరో కొత్త జట్టును కొని యజమాని అవతారం ఎత్తబోతున్నాడు. చెన్నై, రాజస్థాన్ జట్ల స్థానంలో ఇండోర్, కాన్పూర్, అహ్మదాబాద్ నుంచి రెండు జట్లు వచ్చే అవకాశాలు ఉన్నాయి. వీటిలో ఒక జట్టును కొనేందుకు ధోనీ రెడీ అయ్యాడు. అయితే ఐపీఎల్ జట్ల కొనుగోళ్ల అంశాన్ని బీసీసీఐ దృష్టికి కూడా మహీ తీసుకెళ్లినట్టు తెలుస్తోంది. ధోని యజమానిగా మారితే అదే జట్టులో ఆటగాడిగా కొనసాగుతాడా? నిబంధనల ప్రకారం అలా వీలవుతుందా? అనే సందేహాలు అభిమానుల్లో ప్రారంభమయ్యాయి.