కేసును అమిత్ పట్టించుకోలేదు.. అందుకే!

Posted: 10/28/2015 06:28 PM IST

Producer vandana jain talks about amith mishra case

టీమిండియా స్పిన్నర్ అమిత్ మిశ్రా తనపై అనుచిత వ్యాఖ్యలు చేస్తూ దాడికి పాల్పడ్డాడని అతని స్నేహితురాలు, బాలీవుడ్ నిర్మాత వందనా జైన్ సెప్టెంబర్ 27న బెంగుళూరులోని అశోక్ నగర్ పోలీసు స్టేషన్‌లో వందన ఫిర్యాదు చేసింది. దీంతో అమిత్ మిశ్రాను బెంగళూరు పోలీసులు మంగళవారం అరెస్ట్ చేశారు. మూడు గంటల విచారణ అనంతరం 'స్టేషన్ బెయిల్'పై విడుదల చేశారు. నిజానికి ఈ కేసును వందనా ఉపసంహరించుకోవాలని మొదట భావంచిందట. కానీ.. ఈ కేసు గురించి అమిత్ అస్సలు పట్టించుకోకపోవడం ఆమెకు ఆశ్చర్యానికి గురిచేసిందని.. అందుకే తన నిర్ణయాన్ని మార్చుకున్నానని ఆమె స్పష్టం చేసింది.

'కేసు ఉపసంహరించుకోవాలని మొదట్లో అనుకున్నా. కానీ కేసు గురించి అమిత్ మిశ్రా అసలు పట్టించుకోకపోవడం నాకు ఆశ్చర్యాన్ని కలిగించింది. అందుకే నా నిర్ణయాన్ని మార్చుకున్నా. ఇప్పుడు ఈ కేసు కోర్టు, పోలీసుల ముందు ఉంది. తర్వాత ఏం జరుగుతుందనేది వారే తేలుస్తారు' అని వందన పేర్కొంది. ఇప్పుడిప్పుడే కెరీర్ ఎదుగుతున్న క్రమంలో అమిత్ మిశ్రాపై ఇలా కేసు నమోదు కావడంపై కొందరు భిన్నాభిప్రాయాలు వెల్లడిస్తున్నారు. ఈ కేసుతో అతని కెరీర్ గాడిలో పడే అవకాశం వుందని చెప్పుకుంటున్నారు. మరోవైపు.. తనమీద కేసు నమోదైనప్పుడు అందుకు సానుకూలంగా వ్యవహరించకుండా మిశ్రా ఎందుకు ఇలా మొండిగా వ్యవహరిస్తున్నాడో అంతు చిక్కకుండా వుంది. తన స్నేహితురాలే కాబట్టి.. ఆమెతో ఈ కేసు వ్యవహరంపై చర్చించి వుండాల్సిందని కొందరు సూచిస్తున్నా.. మిశ్రా మాత్రం తన వైఖరి మార్చుకునేలా కనిపంచట్లేదు. చివరికి.. ఈ కేసు అతని కెరీర్ ని ఏ మలుపు తిప్పుతుందో వేచి చూడాలి.

మరోవైపు.. వందనా తన స్నేహితుడిన మిశ్రాపైనే కేసు పెట్టడమేంటని మరికొందరు మండిపడుతున్నారు. ఒకవేళ అతను అనుచిత వ్యాఖ్యలు చేసి వుంటే.. అందుకు సానుకూలంగా వ్యవహరించి ఇద్దరు చర్చించుకోవాల్సిందని, అలాకాకుండా ఆవేశంతో రగిలిపోయి కేసు ఎందుకు పెట్టాల్సి వచ్చిందంటూ చెబుతున్నారు. ఏదేమైనా.. ఈ వ్యవహారం ఇంకా వేడిగానే సాగుతుందని అనుకుంటున్నారు.