ధోనీ ఇచ్చిన షాక్ కి చిక్కుల్లో పడ్డ ‘మ్యాక్స్’ మొబైల్ సంస్థ

Posted: 04/21/2015 12:41 PM IST

Mahendra singh dhoni moves court against max mobile firm

ప్రపంచవ్యాప్తంగా చాలా కూలెస్ట్ క్రికెట్ ప్లేయర్ గా ప్రత్యేక గుర్తింపు సాధించిన మహేంద్రసింగ్ ధోనీకి ఈసారి కోపమొచ్చింది. తీవ్ర ఆగ్రహానికి గురైన ఇతని కోపానికి ఏకంగా ఓ మొబైల్ సంస్థ చిక్కుల్లో పడింది. గతంలోనే ధోనీ ఆ సంస్థను హెచ్చరించాడు. కానీ ధోనీ కూలెస్ట్ డూడ్ కదా ఎటువంటి వివాదాలు రావని ఆ సంస్థ భావించిందేమో.. ఈసారి కాస్త మితిమీరి వ్యవహరించింది. అంతే! గతంలో వార్నింగ్ ఇచ్చిన ధోనీ ఈసారి ఆ సంస్థపై డైరెక్ట్ అటాక్ చేశాడు.

వివరాల్లోకి వెళ్తే.. కొన్నాళ్లక్రితం ధోనీ ‘మ్యాక్స్’ మొబైల్ సంస్థకు బ్రాండ్ అంబాసిడర్ గా కొనసాగిన విషయం అందరికీ గుర్తుండే వుంటుంది. ఆ సంస్థ మొబైల్స్ ను ప్రచారం చేసే భాగంలో ధోనీ కొన్నాళ్లపాటు ఒప్పందం కుదుర్చుకున్నాడు. దీంతో ఆ సంస్థ ధోనీతో కొన్ని యాడ్స్ చేయించుకుంది. అయితే.. తనతో ఒప్పందం కింద రూ.10 కోట్ల మేర బకాయిలు ఇంకా చెల్లించలదేని, ఇంకా ఇతరత్ర వివాదాలు వచ్చిన నేపథ్యంలో ధోనీ ఆ సంస్థతో ఒప్పందం తెగదెంపులు చేశాడు. అయినప్పటికీ ఆ మొబైల్ తయారీ సంస్థ ఒప్పందానికి విరుద్ధంగా తన పేరును ఉత్పత్తులపై వాడుకుంటోందని ధోనీ కోర్టులో ఫిర్యాదు చేశాడు. దీంతో అప్పుడు కోర్టు ధోనీ పేరును వాణిజ్యపరంగా వినియోగించరాదని ఆ సంస్థను ఆదేశించింది. కానీ.. న్యాయస్థానం ఇచ్చిన ఆదేశం పట్టించుకోకుండా, ధోనీ కోపాన్ని గుర్తించకుండా ఆ సంస్థ అతని పేరును మళ్లీ వాడటం మొదలుపెట్టింది.

అంతే! ఓవైపు ఒప్పందం ప్రకారం ఇంకా బకాయిలు చెల్లించకపోవడమే కాక.. ఒప్పందానికి విరుద్ధంగా తన పేరును వాడుకోడంపై ధోనీకి మరింత కోపం వచ్చింది. మరోసారి ఇతగాడు ఢిల్లీ హైకోర్టులో ఆ కంపెనీ మీద ఫిర్యాదు చేశాడు. ఈ నేపథ్యంలోనే కోర్టు ‘మ్యాక్స్’ సంస్థ నుంచి స్పందన కోరింది. మరి.. ఈసారి ఈ సంస్థ ధోనీకి బకాయిలు చెల్లిస్తుందో లేక పైత్యం ఎక్కువై మరిన్ని చిక్కుల్లో పడుతుందో తెలియాలంటే వేచి చూడాల్సిందే!