50 లక్షల ఫాలోవర్స్ తో కోహ్లీ మరో రికార్డు

Posted: 01/02/2015 09:39 PM IST

భారత క్రికెటర్ విరాట్ కోహ్లీ ఏది చేసినా సంచలనమే అవుతోంది. మొన్న అనుష్క శర్మను వారించినా, శిఖర్ ధావన్ తో వాదించినా.. అది వెంటనే మీడియాకు చేరి.. సంచలనంగా మారుతుంది. అయితే ఇప్పుడు కూడా విరాట్ మరో సంచలనానికి తెరలేపాడు. భారత టెస్టు క్రికెట్ జట్టు కెప్టెన్గా ప్రమోషన్ పొందిన యువ బ్యాట్స్మన్ కు అమాంతం క్రేజ్ బాగా పెరిగిపోతోంది. సోషల్ మీడియాలోనూ విరాట్ హవా తీవ్రంగా కొనసాగుతోంది. టెస్టు కెప్టెన్సీ బాధ్యతలు ఇంకా పూర్తిగా తీసుకోకమునుపే.. ఆయన ఏకంగా కొత్త రికార్డులను నమోదు చేసుకుంటూ సంచలనాలకు కేంద్ర బిందువుగా మారారు. ట్విట్టర్లో అత్యంత ఆదరణ గల క్రికెటర్ కోహ్లీ మరో రికార్డును నమోదు చేసుకున్నారు.

ట్విట్టర్లో మొన్నటివరకు అత్యధిక ఫాలోయర్స్ ఉన్న క్రికెటర్గా ఉన్న బ్యాటింగ్ దిగ్గజం సచిన్ టెండూల్కర్ను అధిగమించిన విరాట్.. తాజాగా మరో ఘనత సాధించాడు. 50 లక్షల మంది ఫాలోయర్స్ ఉన్న తొలి క్రికెటర్గా విరాట్ రికార్డు సృష్టించాడు.  ట్విట్టర్లో విరాట్కు  5,004,544 మంది ఫాలోయర్స్ ఉన్నారు. సచిన్కు  4,910,498 మంది, టెస్టులకు గుడ్ బై చెప్పిన ధోనీకి 3,374,509 మంది ఫాలోయర్స్ ఉన్నారు. విరాట్కు కేవలం మూడు నెలల్లోనే పది లక్షల మంది ఫాలోయర్స్ పెరగడం విశేషం. విరాట్ తన ఫాలోయర్స్కు కృతజ్ఞతలు తెలిపారు.

జి. మనోహర్