Posted: 12/07/2012 11:09 AM IST

       రాష్ట్ర రాజధానిలో సంచలనం సృష్టించిన సాఫ్ట్‌ వేర్ ఇంజనీర్ నీలిమ మృతి కేసు మిస్టరీ ఎట్టకేలకు వీడింది. నీలిమ మృతదేహంపై ఎలాంటి గాయాలు లేవని గాంధీ ఆస్పత్రి వైద్యులు పోస్టుమార్టం రిపోర్టులో పేర్కొన్నారు. ఆమె విషం లేదా మత్తుపానీయాలు తీసుకోలేదని ఫోరెన్సిక్ ల్యాబ్(ఎఫ్‌ఎస్‌ఎల్) నివేదిక స్పష్టం చేసింది. ఇన్ఫోసిస్ కార్యాలయం భవనంపై నుంచి పడటంతో అయిన తీవ్ర గాయాల వల్లే నీలిమ మరణించిందని వైద్యులు తేల్చారు. గత జూలై 31న రాత్రి 10.30 గంటల సమయంలో గచ్చిబౌలిలోని ఇస్ఫోసిస్ భవనంపైనుంచి పడి నీలిమ చనిపోయిన విషయం తెలిసిందే. భర్త సురేష్‌రెడ్డికి మెయిల్ చేసిన కొద్దిసేపటికే ఈ ఘటన జరిగింది. 

        సంఘటన సమయంలో నెలకొన్న పరిణామాలు, మెయిల్‌ను విశ్లేషించిన పోలీసులు భర్త తీరుతో మనస్తాపానికి గురై నీలిమ ఆత్మహత్యకు పాల్పడిందని గుర్తించారు. ఆమె తల్లిదండ్రుల నుంచి వాగ్మూలం సేకరించారు. వారు ఎవరిపైనా అనుమానం వ్యక్తం చేయకపోవడం, వైద్య నివేదికలు కూడా ఆత్మహత్యకు పాల్పడినట్లు తేల్చటంతో ఈ కేసు ఇంతటితో క్లోజ్ చేయబోతున్నారు.
         కాగా, మాదాపూర్ ఏసీపీ అనుమతి తీసుకొని శేరిలింగంపల్లి తహసీల్దార్‌కు నివేదిక అందచేస్తామని, రాయదుర్గం ఇన్‌స్పెక్టర్ బాలకోటి విలేఖరులకు వెల్లడించారు.

...avnk