ఇంతటితో ముగిద్దాం- నా మనసు గాయపడింది : నన్నపనేని

Posted: 12/17/2013 08:16 PM IST

రాష్ట్ర విభజన బిల్లుపై శాసనసభలో చర్చ ప్రారంభమైందన్న వివాదం కొనసాగుతున్న నేపథ్యంలో.. ప్రస్తుత శాసనసభ సమావేశాలను నిరవధికంగా వాయిదా వేయించి విభజన బిల్లుపై మరోసారి ప్రత్యేక సమావేశాలు పెట్టించాలని ముఖ్యమంత్రి కిరణ్‌కుమార్‌రెడ్డి, సీమాంధ్ర మంత్రులు నిర్ణయించారు. ముసాయిదా బిల్లుపై రాష్ట్రపతి ఇచ్చిన గడువు చివరి తేదీ వరకూ సమయాన్ని వినియోగించుకోవాలని, అవసరమైతే రాష్ట్రపతిని అదనంగా మరో 20 రోజుల సమయం కోరాలని కూడా వారు భావించారు. అయితే అసెంబ్లీలో రభసా మాత్రం ఇంతటితో ముగిద్దాం అని సీమాంద్ర నాయకులు అంటున్నారు.

 

మనసు గాయపడింది

 

తెలంగాణ ముసాయిదా బిల్లుపై శాసనమండలిలో జరిగిన ఘటనతో తన మనసుకు గాయమైందని టీడీపీ ఎమ్మెల్సీ నన్నపనేని రాజకుమారి పేర్కొన్నారు. నిన్న జరిగిన ఘటనలో ఆమె కిందపడిపోయారు. దీనిపై మంగళవారం నన్నపపేని మాట్లాడుతూ జరిగిన ఘటనలో తగిలిన దెబ్బలు కంటే మనసుకు గాయమైందని అన్నారు. దీనిపై పిర్యాదు చేశామని దానికి వారు క్షమాపణలు చెప్పారని అన్నారు. అయితే దానిపై ఇప్పుడు ప్రస్తావన తేవడం సరికాదని ఆమె అన్నారు.

 

రాష్ట్ర విభజన జరగకముందే ఇలా ఉంటే, రేపు విభజన జరిగిన తర్వాత ఎలా ఉంటుందో ప్రజలు అర్ధం చేసుకోవాలని నన్నపనేని కోరారు. తెలంగాణ కోసం వారు మాట్లాడినప్పుడు, సీమాంధ్రలో ఉన్న సమస్యలపై తాము మాట్లాడడం తప్పా? అంటూ ఆమె ప్రశ్నించారు. ఈ విధంగా ఉంటే సీమాంద్రులకు ప్రాణ, ఆస్తులకు రక్షణ ఎక్కడ ఉంటుందని ఆమె అభిప్రాయం వ్యక్తం చేశారు.

 

బిల్లుపై సమయం జనవరి 23 వరకు ఉంటే, రెండు, మూడు రోజుల్లో చర్చలు ముగించి, 'మమా' అనిపించి, రాష్ట్రపతికి పంపాలని డిమాండ్ చేయడం సరికాదని ఆమె అన్నారు. ఇదెక్కడి న్యాయమని నన్నపనేని ప్రశ్నించారు. నాయకులనే ప్రాణ రక్షణ లేకపోతే, ఇక సామాన్య ప్రజలకు రక్షణ ఎక్కడ ఉంటుందని ఆమె ప్రశ్నించారు.