Posted: 04/11/2012 01:40 PM IST

సినిమా ఇండస్ట్రీలో వివాదాలు సర్వసాధారణం. అవి టాలీవుడ్ లో అయినా, బాలీవుడ్ లో అయినా, ఇంకా ఏ వుడ్ లోనైనా కామన్. అయితే ఈ మధ్య టాలీవుడ్ లో ఈ వివాదాలు తారా స్థాయికి చేరుకున్నాయి. గతంలో వజ్రోత్సవాల సమయంలో చిరంజీవి – మోహన్ బాబుకి, ఆ మధ్యన దాసరికి మెగా ఫ్యామిలీకి, అలాగే నందమూరి ఫ్యామిలీలో కూడా వివాదాలు తారా స్థాయికి చేరి ఒకరి పై ఒకరు సెటైర్లు వేసుకున్నారు. ఇవి అప్పుడప్పుడు మళ్ళీ అగ్గి రాజుకుంటుంటాయి.

వజ్రోత్సవాల తరువాత చిరు మోహన్ బాబులు కొన్ని రోజులు దూరంగా ఉన్న, చిరు తిరుపతి ఎమ్మెల్యే అయిన తరువాత మా మధ్య విభేదాలు లేవని తెలపడానికి ఆ మధ్య మోహన్ బాబు స్కూలుకు వెళ్లి నిరూపించాడు. తాజాగా మరోసారి చిరంజీవికీ మోహన్ బాబుకి మళ్ళీ వార్ స్టార్ట్ అయింది. నిన్న జరిగిన  ANR సన్మాన కార్యక్రమంలో వీరిద్దరు ఒకరి పై ఒకరు సెటైర్లు వేసుకున్నారు.

దీంతో వీరిద్దరి మధ్య మళ్లీ అగ్గి రాజుకుంది. ఏ స్టేజ్‌మీదైనా సరే.. తాను అనుకున్నది నిర్మొహమాటంగా మాట్లాడే మోహన్‌బాబు... ANRను సరదాగా ఆటపట్టించారు. టాలీవుడ్‌లో NTR తర్వాత ఆ స్థాయిలో డైలాగ్‌లు చెప్పేది తానొక్కడినేనని.. సాక్షాత్తూ ANR సతీమణే ఒప్పుకున్నారని కాస్త గర్వంగా అన్నారు. మోహన్‌బాబు తర్వాత మైకందుకున్న చిరంజీవి దీనికి.. తనదైన స్టైల్లో సుతిమెత్తగానే కౌంటర్‌ వేశారు. బిడ్డ గొప్పదాన్ని తల్లి పొగిడినంత మాత్రాన.. తామేదో గొప్పవాళ్లమైపోయినట్టు చెప్పుకోవడం సరికాదని అన్నారు. ANR మాట్లాడుతుండగా మధ్యలో మైక్ అందుకుని మరీ చిరంజీవి.. మోహన్‌బాబుకు కౌంటర్ ఇవ్వడం విశేషం.చిరంజీవి పంచ్‌కి మోహన్‌బాబు కౌంటర్ ఇస్తారని అంతా అనుకున్నా.. ANR అవార్డ్ ఫంక్షన్‌ కాస్తా పక్కదారి పట్టకుండా సంయమనం పాటించారు. ఈ మాటకుమాట అంతా.. చిరునవ్వుల మధ్యే సాగినా.. అంతర్లీనంగా ఇద్దరి మధ్యా ఉన్న మనస్పర్థల్ని మరోమారు బయటపెట్టింది. మరి ఈ వివాదం మళ్ళీ ఎన్నాళ్ళు కొనసాగుతుందోనని టాలీవుడ్ వర్గాలు అనుకుంటున్నారు.