Posted: 02/02/2012 03:12 PM IST

షారుక్‌ఖాన్... బాలీవుడ్ బాద్‌షా మాత్రమే కాదు, మనీ బాద్‌షా కూడా. ఆసియాలోని అత్యంత సంపన్నుల జాబితాలో ఆయన ఒకరు. కాలేజ్ డేస్‌లో చదివిన ఆర్థిక శాస్త్రం ఎంత బాగా వంట బట్టిందో ఆయన ఆస్తులు చూస్తే తెలిసిపోతుంది. మొత్తం నికర ఆస్తుల విలువే 2900 కోట్లు.ప్రస్తుతం ఆయన సుమారు 50 బ్రాండ్లకు అంబాసిడర్. ఒకవైపు సినిమాల్లో సూపర్ స్టార్‌గా నిలదొక్కుకుని విజయవంతంగా సాగుతూనే మరోవైపు నిర్మాతగా మారి సినిమా వ్యాపారంలోకి దిగారు. ఆయన ఆధ్వర్యంలోని డ్రీమ్స్ అన్‌లిమిటెడ్, రెడ్ చిల్లీస్ ఎంటర్‌టైన్‌మెంట్ సంస్థలు పలు సినిమాలను నిర్మించాయి.‘నాకు డబ్బు అవసరం’ అని బహిరంగంగా చెప్పే షారుక్ తరచుగా స్టేజ్ షోలు చేస్తుంటారు.

తాజాగా దక్షిణాఫ్రికాలో జరిగిన ఎన్నారైల వందేళ్ల ఉత్సవాలతో పాటు ప్రపంచ వ్యాప్తంగా ఎన్నో స్టేజ్ షోలు చేశారు. ఒక్కోసారి కేవలం పది నిమిషాల షోకు పది కోట్ల రూపాయలు తీసుకున్న సందర్భాలు కూడా ఉన్నాయి. అప్పుడప్పుడు టీవీ ప్రెజెంటర్‌గా కూడా పనిచేస్తుంటారు. ‘ఎస్‌కే’ పేరుతో ఓ ఫ్రెంచి కంపెనీతో కలిసి ఆయన పర్‌ఫ్యూమ్ (అత్తరు)ను కూడా విడుదల చేశారు. జుహీచావ్లా భర్త జై మెహతా భాగస్వామ్యంలో ఐపీఎల్ టీం కోల్‌కతా నైట్‌రైడర్స్‌ను ఆయన సొంతం చేసుకున్నారు. వీరిద్దరూ కలిసి గుజరాత్‌లోని పోర్‌బందరులో ఓ క్రికెట్ స్టేడియం నిర్మించాలనే ఆలోచనతో ఉన్నారు.