Posted: 01/25/2012 02:01 PM IST

శ్రీకాంత్ అడ్డాల దర్శకత్వం వహిస్తూ, ప్రముఖ నిర్మాత దిల్ రాజు శ్రీ వెంకటేశ్వర క్రియేషన్స్ బ్యానర్‌పై విక్టరీ వెంకటేష్, సూపర్ స్టార్ మహేష్ బాబు మల్టీ స్టారర్ గా ‘సీతమ్మ వాకిట్లో సిరిమల్లె చెట్టు’ అనే చిత్రం రూపొందుతున్న విషయం తెలిసిందే. అయితే ఈ సినిమా టైటిల్ ఏ ముహూర్తాన పెట్టారో కానీ అన్ని సంచలనాలే జరుగుతున్నాయి. వినడానికి ఎంతో వినసొంపుగా ఈ చిత్రం పేరు ఇప్పటికే హైలెట్ అయ్యింది. ప్రస్తుతం ఈ సినిమా షూటింగ్ వైజాగ్ లో జరుగుతోంది. హీరో వెంకటేష్ పై పలు సీన్లు చిత్రీకరిస్తున్నారు. మరికొన్ని రోజుల్లో మహేష్ బాబు షూటింగులో జాయిన్ కాబోతున్నారు.

అయితే మొన్నటి వరకు ఈ సినిమాకి హీరోయిన్ల సమస్య వెంటాడినా చివరకు అంజలి, సమంతా ఖరారు అయ్యారు. అయితే వీరిద్దరే కాకుండా ఈ సినిమాలో మరో ముగ్గురు హీరోయిన్లు కూడా నటిస్తున్నారని వార్తలు. అదేంటి ఇద్దరు దొరకడానికే కష్టంగా ఉన్న ఈ ప్రాజెక్ట్ కి ఏకంగా ఐదుగురు హీరోయిన్లా అని ఆశ్చర్యపోకండి. ఈ సినిమాలో 5గురు హీరోయిన్లు నటిస్తున్నారనే వార్తలు గట్టిగానే వినిపిస్తున్నాయి. ఒకప్పటి మేటి హీరోయిన్ జయసుధ ఇందులో ప్రకాష్ రాజ్ భార్యగా నటిస్తున్నారు. ఇక వెంకటేష్ సరసన జర్నీ ఫేం అంజలి ఎంపికయింది. మహేష్ బాబు సరసన హాట్ హీరోయిన్ సమంత రొమాన్స్ చేయనుంది. వీరితో పాటు హీరోయిన్ శ్వేతా బసు ప్రసాద్ ఈ చిత్రంలో వెంకీ-మహేష్ చెల్లెలు పాత్రలో కనిపించనుంది. తాజాగా అందిన సమాచారం ప్రకారం ఈ చిత్రంలో అమలపాల్ కూడా నటిస్తోందని, ఈవిడ వెంకీ-మహేష్ మరదలు పాత్ర పోషిస్తోందని తెలుస్తోంది.

ఏది ఏమైనా ఈ సినిమాలో 5 గురు నటించడం హైలెట్. ఇప్పటికే ఈ సినిమా పై భారీ అంచనాలు ఉన్నాయి. కాబట్టి ఈ సినిమా మంచి ఫ్యామిలీ ఎంటర్ టైనర్ గా నిలుస్తుందని పరిశ్రమ వర్గాలు అంటున్నాయి.