Posted: 08/18/2012 05:33 PM IST

ఈ ఏడాది తెలుగు తెరపై ఒకసారి తమిళ తెరపై రెండు సార్లు కనిపించబోతున్నారు రానా. క్రిష్ దర్శకత్వంలో రానా నటిస్తున్న ‘కృష్ణం వందే జగద్గురుమ్’ తెలుగు, తమిళ (ఓంకారం) భాషల్లో ఏకకాలంలో రూపొందుతున్న విషయం తెలిసిందే. ఈ రెండు భాషల్లోనూ దసరాకి ఈ చిత్రం విడుదల కానుంది. వాస్తవానికి ‘వడ చెన్నయ్’ అనే చిత్రం ద్వారా రానా తమిళ తెరకు పరిచయం కావల్సింది. రానాతో ఆ చిత్రదర్శకుడు వెట్రిమారన్ సంప్రదింపులు కూడా జరిపారు.అయితే రానా ఆ చిత్రం చేయలేదు.

‘ఓంకారం’ ద్వారా తమిళంలో హీరోగా పరిచయం కానున్న రానా ప్రస్తుతం అజిత్ హీరోగా విష్ణువర్థన్ దర్శకత్వంలో రూపొందుతున్న ఓ తమిళ చిత్రంలో ప్రత్యేక పాత్ర చేయడానికి అంగీకరించారు. హీరోగా చేస్తున్న రానా స్పెషల్ రోల్ ఒప్పుకున్నారంటే, ఈ పాత్ర ఎంత తనకు నచ్చి ఉంటుందో ఊహించుకోవచ్చు. ప్రస్తుతం ఈ పాత్రకు సంబంధించిన సన్నివేశాలను ముంబయ్‌లో చిత్రీకరిస్తున్నారు. ‘‘నా మాతృభాష తెలుగు. ప్రస్తుతం నేను ఉన్నది తమిళ చిత్రం షూటింగ్‌లో. చిత్రీకరిస్తున్నది ముంబయ్‌లో. భలే ఉంది’’ అని ఈ సందర్భంగా రానా అన్నారు. నవంబర్‌లో ఈ చిత్రాన్ని విడుదల చేయడానికి సన్నాహాలు చేస్తున్నారు.