Posted: 06/26/2012 06:05 PM IST

హీరో విక్రమ్ సినిమాకు  విచిత్రమైన కష్టాలు వస్తున్నాయట.  ఆ సినిమా షూటింగ్  మొదలు పెట్టిన దగ్గర నుండి  సమస్యల సుడి గుండంలో తిరుగుతుందని తమిళ్ వాసులు అంటున్నారు. సినిమా ఆరంభం నుంచి విడుదల వరకు నిర్మాత ఎదుర్కొనే మానసిక సంఘర్షణలను ప్రసవ వేదనతో పోల్చుతుంటారు. నవమాసాలు మోసి, ఎన్నో వ్యయప్రయాసలకోర్చి తల్లి బిడ్డకు జన్మనిచ్చినట్లుగా.. సినిమా నిర్మాణంలో కూడా ఎన్నో వ్యయప్రయాసలుంటాయి. అందుకు తాజా ఉదాహరణ ‘కరికాలన్’. విక్రమ్ హీరోగా బాలీవుడ్ భామ జరీన్‌ఖాన్ హీరోయిన్‌గా ఈ చిత్రం జనవరిలో ఆరంభమైంది.

కన్నన్ దర్శకుడు. ఇది పిరీడ్ ఫిల్మ్. దక్షిణ భారతదేశానికి చెందిన ప్రాచీన చక్రవర్తి కరికాలన్ జీవితం ఆధారంగా ఈ చిత్రాన్ని రూపొందిస్తున్నారన్నది కోలీవుడ్ టాక్. ఈ చిత్రాన్ని ఏ ముహూర్తాన ఆరంభించారో కానీ కొన్ని రోజులు షూటింగ్ జరిపారో లేదో ఈ కథ, టైటిల్ నాది అంటూ రాజశేఖర్ అనే వ్యక్తి కోర్టుకెక్కారు. అలా ‘కరికాలన్’కి తొలి సమస్య ఏర్పడింది. ఈ సమస్య చాలదన్నట్లు సినిమా నిర్మాణంలో కూడా కొన్ని సమస్యలు నెలకొనడంతో షూటింగ్‌కి బ్రేక్ పడింది. ఇప్పుడు ‘కరికాలన్’ అన్ని సమస్యలను పరిష్కరించుకుని షూటింగ్‌కి సిద్ధమయ్యాడు. అయితే దర్శకుడ్ని మార్చారని వినికిడి. అందుకు గల కారణాలు బయటికి రాలేదు. ఇప్పుడు కన్నన్ స్థానంలో గాంధీకృష్ణ వచ్చారు.  ఈ చిత్రానికి కథ, మాటలు అందించినది ఆయనే. అందుకని వేరే దర్శకుడు ఎందుకని, గాంధీకృష్ణతోనే డెరైక్షన్ చేయించాలని చిత్రనిర్మాతలు ఎస్.ఎస్. వాసన్, ఎస్.పార్తీ నిర్ణయించుకున్నారట. ఇక ‘కరికాలన్’కి ఎలాంటి సమస్యలు రావని, షూటింగ్ సజావుగా సాగుతుందనే దృఢసంకల్పంతో ఈ యూనిట్ సభ్యులు రంగంలో దిగడానికి సిద్ధమయ్యారు. మరి, నిర్మాతల కష్టాలకు ఇకనైనా తెరపడుతుందో లేదో కాలమే చెప్పాలి.