Posted: 12/17/2011 02:04 PM IST

కాంగ్రెస్ పార్టీకి గడ్డు కాలం మొదలయ్యిందా ? ఇప్పటికే అనేక రాష్ట్రాలలో కాంగ్రెస్ కి వ్యతిరేకంగా ప్రతిపక్షాలు తిరగబడుతున్నాయి. ఆంద్రప్రదేశ్ లో అయితే ఏకంగా అవిశ్వాస తీర్మానం వరకు వెళ్ళింది. ఇప్పుడు అందరి కన్ను 2014 ఎన్నికల పై పడింది. వీటి కోసం ఏ పార్టీ చేయాల్సిన ప్రయత్నాలు ఆపార్టీ మొదలు పెట్టింది. కేంద్రంలో కూడా ప్రధాని పీఠం పై చాల మందే కన్నేసి ఉంచారు. 2014లో రాహుల్ గాంధీని ప్రధాని చేయాలని కాంగ్రెస్ ప్రయత్నిస్తుంటే, బీజేపీ నుండి అద్వానీ కానీ, మోడీ కానీ ప్రదాని పీఠం ఎక్కాలని చూస్తున్నారు. తాజా మరో నాయకుడు కూడా ప్రధాని పీఠం పై కన్నేశాడు. ఆయనే నేషనలిస్ట్‌ కాంగ్రెస్‌ పార్టీ (ఎన్సీపి) అధిపతి శరద్‌పవార్‌.

పవార్‌కు ప్రధాని పీఠంపై కన్నుందనే విష యం పాతదే అయినప్పటికీ తాజాగా జరిగిన సంఘటనల నేపథ్యంలో ఈ ప్రచారానికి ఊతమిస్తున్నాయి. మొదటిది అఫ్జల్‌పూర్‌కు చెందిన ఎమ్మెల్యే మాలికయ్య గుత్తేదార్‌ పవార్‌ను కర్ణాటకలో పర్యటించమని ఆహ్వానించడం కా గా రెండవది మాజీ ముఖ్యమంత్రి యడ్యూరప్ప తనకు పవార్‌తో ఎటువంటి ఒప్పందం లేదని ఖండించడం.

యడ్యూరప్ప తనను పార్టీ పక్కన పెడుతోందని అలిగిన సమయంలో గుత్తేదార్‌ ఈ వైఖరి తీసుకోవడం అనేక వదంతులకు తావిచ్చింది. ప్రస్తుతం జరుగుతున్న అసెంబ్లీ సమావేశాలు పూర్తికాగానే కర్ణాటకలో ఎన్సీపికి పునాదులు వేసేందుకు రావలసిందిగా బుధవారం గుత్తేదార్‌ ఆహ్వానించడం పలువురిని ఆశ్చర్యానికి గురి చేసింది. గుత్తేదార్‌కు దాదాపు 10 మంది కాంగ్రెస్‌ ఎమ్మెల్యేల మద్దతు ఉన్నది. వీరిలో ఎక్కువమంది ఉత్తర కర్ణాటకకు చెందినవారే. రాష్ట్రంలోని ఆ ప్రాంతంలో రైతాంగ సంక్షేమానికి మంచి ప్రత్యామ్నాయం తామేనని ప్రొజెక్ట్‌ చేసుకునేందుకు ఎన్సీపిని ఒక మంచి వాహనంగా వారు భావిస్తున్నారు. ఇదిలా ఉంటే పవార్‌కు, యడ్యూరప్పకు మధ్య పొత్తు కుదిరిందనే పుకార్లు షికారు చేస్తున్నాయి.

అయితే పవార్ దీని కోసం వివిధ పార్టీల నాయకుల మద్దతు కూడగడుతున్నాడని అనుకుంటున్నాడు. ఆంధ్రప్రదేశ్ లో జగన్ వర్గాన్ని, తమిళనాడులో జయలలితను, ఉత్తరప్రదేశ్ లో మాయావతి మద్దతు, కర్ణాటకలో యడ్యూరప్ప మద్దతు కూడగడుతున్నాడని రాజకీయ వర్గాల సమాచారం. మరి శరత్ పవార్ ఎత్తులు పనిచేస్తాయో లేదో చూడాలి.