చిరంజీవి ‘వాల్తేరు వీర‌య్య’ మెగా షెడ్యూల్ ప్రారంభం..!

Posted: 09/03/2022 04:02 PM IST

Mega shedule of chiranjeevi s waltair veeraiah to begin in hyderabad

మెగాస్టార్ చిరంజీవి వ‌రుస‌గా సినిమాల‌ను చేస్తూ బిజీగా ఉన్నారు. కొరటాల శివ దర్శకత్వంలో ఆయన నటించిన తొలి చిత్రం ఆచార్య ప్రేక్షకుల అంచనాలతో పాటు మెగా అభిమానుల అంచనాలను కూడా బాగా దెబ్బతీసింది. ఈ క్ర‌మంలో చిరు త‌న త‌దుప‌రి చిత్రాల‌పై పూర్తి దృష్టిని పెట్టాడు. ప్ర‌స్తుతం చిరు రెండు సినిమాల షూటింగ్‌ ఏక‌కాలంలో జ‌రుపుతూ యువ హీరోలకు పోటీని ఇస్తున్నాడు. అందులో బాబీ ద‌ర్శ‌క‌త్వంలో తెర‌కెక్కుతున్న వాల్తేరు వీర‌య్య ఒక‌టి. యాక్ష‌న్ ఫ్యామిలీ ఎంట‌ర్టైన‌ర్‌గా తెర‌కెక్కుతున్న ఈ చిత్రం ప్ర‌స్తుతం శ‌ర‌వేగంగా షూటింగ్ జ‌రుప‌కుంటుంది.

కాగా తాజాగా ఈ సినిమాకు సంబంధించిన ఓ వార్త నెట్టింట వైర‌ల్‌గా మారింది. తాజాగా హైద‌రాబాద్‌లో ఈ సినిమాకు సంబంధించిన భారీ షెడ్యూల్ ప్రారంభమైంది. ఈ ఎపిసోడ్‌లో కీల‌క ఘట్టాల‌ను తెర‌కెక్కించ‌నున్నార‌ని చిత్రపురిలో వార్తలు వినబడుతున్నాయి‌. ఈ షెడ్యూల్‌లో ర‌వితేజ కూడా పాల్గొన‌నున్నాడ‌ని సమాచారం‌. కాగా ఇటీవ‌లే ద‌ర్శ‌కుడు బాబీ తండ్రి మ‌ర‌ణించిన విష‌యం తెలిసిందే. అయితే షూటింగ్ త‌న వ‌ల్ల ఆగిపోవ‌ద్ద‌నే ఉద్దేశంతో బాబీ కొత్త‌ షెడ్యూల్‌ను ప్రారంభించడం గొప్ప విష‌యం అనే చెప్పాలి.

ఈ చిత్రం ‘ముఠా మేస్త్రీ’ త‌ర‌హా మాస్ యాంగిల్‌లో అటు మాస్ తో పాటు ఇటు క్లాస్ ఆడియన్స్ ను కూడా నచ్చేట్టుగా కథను, కథనాన్ని దర్శకుడు బాబి రూపోందించుకున్నారు. ఇక ఇప్పటికే అందుతున్న లీకులకు తోడు ఈ చిత్ర పోస్ట‌ర్ల‌ను చూసినా.. ఈ విషయం ఇట్టే అర్థమైపోతోంది. చిరు ఈ సినిమాలో అండ‌ర్ క‌వ‌ర్ కాప్‌గా క‌నిపించ‌నున్నాడు. విశాఖ‌ప‌ట్నం నేప‌థ్యంలో తెర‌కెక్క‌నున్న ఈ చిత్రంలో శృతిహాస‌న్ హీరోయిన్‌గా న‌టిస్తుంది. మాస్‌రాజ ర‌వితేజ కీల‌క‌పాత్రలో న‌టిస్తున్నాడు. మైత్రీ మూవీ మేక‌ర్స్ సంస్థ నిర్మిస్తున్న ఈ చిత్రం మెగాస్టార్‌కు 154వ సినిమాగా తెర‌కెక్కుతుంది.