‘సలార్’ తొలి షెడ్యూల్ పూర్తి చేసిన ప్రభాస్

Posted: 02/08/2021 09:59 PM IST

ప్రభాస్‌ కథానాయకుడుగా కన్నడ దర్శకుడు ప్రశాంత్‌ నీల్‌ తెరకెక్కిస్తున్న చిత్రం ‘సలార్‌’. పాన్‌ ఇండియా స్థాయిలో హోంబలే ఫిల్మ్స్‌ సంస్థ నిర్మిస్తుంది. భారీ యాక్షన్‌ నేపథ్యంలో రాబోతున్న ఈ క్రేజీ ప్రాజెక్టు చిత్రీకరణ జనవరిలో ప్రారంభమైన సంగతి తెలిసిందే. గోదావరిఖని బొగ్గుగనిలో కొన్ని కీలక సన్నివేశాలు షూట్‌ చేశారు. తాజాగా తొలి షెడ్యూల్‌ పూర్తయిందని ఈ సినిమాకు పనిచేస్తున్న సినిమాటోగ్రాఫర్‌ భువన్‌ గౌడ సామాజిక  మాధ్యమాల వేదికగా తెలిపారు. ఈ మేరకు ఆయన తన ట్విట్టర్ ఖాతాలో పర్వతంలో ఒ మెట్టు అధిరోహించామని ప్రకటించారు.

ఇది చాలా అద్భుతమైన చిత్రమని, ఇందులో తన క్యారెక్టర్ చాలా హింసాత్మకంగా వుంటుందని, ఇలాంటి చిత్రాల్లో తాను ఇంతకు ముందు నటించలేదని ప్రభాస్ ఈ సందర్భంగా అన్నారు. ఇక ఇది పాన్ ఇండియా చిత్రమని.. ఈ చిత్రం షూటింగ్ తొలి షెడ్యూల్ పూర్తైయినా తాను రెండో షెడ్యూల్ కోసం ఆగలేకపోతున్నానని అన్నాడు రెబెల్ స్టార్. ఈ చిత్రంలో ప్రభాస్‌ సరసన శ్రుతిహాసన్‌ నటిస్తోంది. కన్నడ నటుడు మధూ గురుస్వామి ప్రతినాయకుడుగా కనిపించనున్నారు. ‘కేజీఎఫ్‌’ సిరీస్‌ల తర్వాత ప్రశాంత్‌ నీల్‌ దర్శకత్వం వహిస్తున్న చిత్రం కావడంతో భారీ అంచనాలు ఏర్పడుతున్నాయి. ఇప్పటికే విడుదలైన ప్రభాస్‌ లుక్‌ వాటిని రెట్టింపు చేస్తోంది.