మెగాస్టార్ ‘సైరా’ను ప్రశంసించిన గవర్నర్ తమిళ సై..

Posted: 10/10/2019 07:21 PM IST

Telangana governor tamilisai soundararajan praises this sye raa

మెగాస్టార్ చిరంజీవి డ్రీమ్ ప్రాజెక్టుగా రూపొందిన చారిత్రాక చిత్రం ‘సైరా’ విమర్శకులతో పాటు ప్రముఖుల ప్రశంసలను కూడా అందుకుంది. ఈ చిత్రంలో చిరంజీవి నటనను అబాలగోపాలం కీర్తిస్తున్నారంటే.. ఆయన ఎంతగా ఈ చిత్రం కోసం శ్రమించారో ఇట్టే అర్థం చేసుకోవచ్చు. తాజాగా తెలంగాణ గవర్నర్ తమిళసై ఇవాళ ఈ చిత్రాన్ని వీక్షించారు. అనంతరం అమె మాట్లాడుతూ.. ఈ చిత్రంలో చిరంజీవి నటనను ప్రశంసించారు.

గడచిన 20 సంవత్సరాల్లో తాను చూసిన రెండో చిత్రం చిరంజీవి నటించిన 'సైరా' అని తెలంగాణ గవర్నర్ తమిళిసై వ్యాఖ్యానించారు. మెగాస్టార్ కోరిక మేరకు సినిమాను చూసిన ఆమె, ఆపై మీడియాతో మాట్లాడారు. చిత్రంలో చిరంజీవి అద్భుతంగా నటించారని కితాబిచ్చారు. 1999 తరువాత తాను 2018లో రజనీకాంత్ నటించిన 'కాలా' చూశానని, ఆపై తాను చూసిన రెండో చిత్రం ఇదేనని ఆమె అన్నారు.

తమిళిసై కోసం సినిమాను ప్రత్యేకంగా ప్రదర్శించగా, ఆమె కుటుంబ సభ్యులతో పాటు, చిరంజీవి కుటుంబీకులు కూడా సినిమా చూశారు. కాగా, ఉయ్యాలవాడ నరసింహారెడ్డి జీవిత చరిత్ర ఆధారంగా దర్శకుడు సురేందర్ రెడ్డి తెరకెక్కించిన 'సైరా'లో చిరంజీవి నటనకు ప్రతిరూపంగా అమె పేర్కోన్నారు. ఈ చిత్రంలో పలు సన్నివేశాలు దేశభక్తిని ప్రేరేపించేవిధంగా.. రోమాలు నిక్కబోడుచుకునేలా వున్నాయని ఇప్పటికే సినీ విమర్శకులు సైతం ప్రశంసించిన విషయం తెలిసిందే.