వెంకీ, వరుణ్ ల ఫస్ట్ లుక్ వచ్చేసింది..

Posted: 11/05/2018 08:16 PM IST

విక్టరీ వెంకటేశ్, మెగా ప్రిన్స్ వరుణ్ తేజ్ కాంబినేషన్‌లో వస్తోన్న మల్టీస్టారర్ ‘ఎఫ్2’. ‘ఫన్ అండ్ ఫ్రస్టేషన్’ అన్న ట్యాగ్ లైన్తో వస్తున్న చిత్రానికి సంబంధించిన ఫస్ట్ లుక్ ప్రేక్షకులకు కనువిందు చేస్తోంది. వెంకటేశ్ సరసన తమన్నా, వ‌రుణ్ తేజ్ కు జంటగా మెహ‌రీన్ న‌టిస్తున్నారు. ఎన్నో విజ‌య‌వంత‌మైన చిత్రాల‌ను తెలుగు ప్రేక్షకుల‌కు అందించిన ప్రముఖ నిర్మాణ సంస్థ శ్రీ వెంక‌టేశ్వర క్రియేష‌న్స్ బ్యాన‌ర్ పై దిల్ రాజు ఈ సినిమాను నిర్మిస్తున్నారు. ‘పటాస్’, ‘సుప్రీమ్’, ‘రాజా ది గ్రేట్’ చిత్రాలతో హ్యాట్రిక్ విజయాలు నమోదుచేసిన అనిల్ రావిపూడి ఈ చిత్రానికి దర్శకత్వం వహిస్తున్నారు.

పూర్తిస్థాయి కుటుంబ కథా చిత్రంగా ‘ఎఫ్2’ చిత్రాన్ని తెరకెక్కిస్తున్న రావిపూడి.. ఈ చిత్రాన్ని సక్రాంతి కానుకగా ప్రేక్షకుల ముందుకు తీసుకురావాలని ఫిక్స్ అయ్యాడు. ఇదిలా ఉంటే, దీపావళి పండుగను పురష్కరించుకుని ‘ఎఫ్2’ ఫస్ట్‌లుక్‌ను విడుదల చేశారు. ఈ ఫస్ట్ లుక్ చాలా సింపుల్ గా ఉంది. వెంకటేశ్, వరుణ్ తేజ్, తమన్నా, మెహ్రీన్‌ మోడరన్ లుక్ లో ఉన్న సంప్రదాయ దుస్తుల్లో కనిపించారు. అంతేకాకుండా ‘వస్తున్నారు సంక్రాంతి అల్లుళ్లు’ అంటూ ఫస్ట్‌ లుక్ పోస్టర్ పై రాశారు.

ఫస్ట్‌లుక్ విడుదల సందర్భంగా నిర్మాత దిల్‌రాజు మాట్లాడుతూ.. ‘కుటుంబ క‌థా చిత్రాల‌కు ప్రాధాన్యత ఇచ్చే మా బ్యాన‌ర్లో వ‌స్తోన్న మంచి వినోదభరిత చిత్రం ‘ఎఫ్‌2’. మెసేజ్‌తో పాటు అన్ని క‌మ‌ర్షియ‌ల్ హంగుల‌ను దర్శకుడు అనిల్ రావిపూడి ఈ చిత్రంలో చూపిస్తున్నారు. మూడు వరుస హిట్స్ తర్వాత అనిల్ చేస్తోన్న చిత్రమిది. ఇప్పటి వ‌ర‌కు 80 శాతం చిత్రీక‌ర‌ణ పూర్తయ్యింది. క్లైమాక్స్‌, మూడు పాట‌లు మాత్రమే మిగిలి ఉన్నాయి. అన్ని కార్యక్రమాల‌ను పూర్తి చేసి సంక్రాంతికి సినిమాను విడుద‌ల చేసేలా ప్లాన్ చేస్తున్నాం’ అని చెప్పారు.