తనయుడ్ని హీరోగా నిలిపే కథ రచనలో పూరీ బిజీ

Posted: 11/03/2018 06:01 PM IST

హీరో ఆకాష్ కు టాలీవుడ్ లో మంచి బ్రేక్ ఇచ్చేందుకు దర్శకుడు పూరి జగన్నాథ్ తీవ్రంగా శ్రమిస్తున్నారు. తన తనయుడు ఆకాశ్ పూరీని హీరోగా పెట్టి 'మెహబూబా' చిత్రానికి దర్శక, నిర్మాణ పనులు చేసినా.. ఆ సినిమా బాక్సాఫీసు వద్ద సందడి చేయలేదు. దీంతో అర్థిక బారంతో సతమతం అయిన పూరీ.. కొంత గ్యాప్ తీసుకున్నా తరువాత తన తనయుడికి మంచి బ్రేక్ ఇవ్వాలని తీవ్రంగా శ్రమిస్తున్నాడని చిత్రపురి వర్గాల్లో టాక్ వినిపిస్తుంది.

అయితే మెహబూబా చిత్రంలో అకాష్ కు మత్రం నటన పరంగా మంచి మార్కులు తెచ్చిపెట్టింది గానీ, లాభాలు తెచ్చిపెట్టలేకపోయింది. ఈ సినిమా కారణంగా పూరి ఆర్థికపరమైన ఇబ్బందుల్లో పడ్డాడనే వార్తలు షికారు చేశాయి. మళ్లీ ఆకాశ్ తో సినిమా వుంటుందో లేదోనని అనుకున్నారు. కానీ ఆకాశ్ హీరోగా ఒక సినిమా రూపొందనుందనేది తాజా సమాచారం.

పూరి ఆఫీసులో ఒక కథపై ఒక రేంజ్ లో కసరత్తు జరుగుతోందట. ఈ కథను ఆకాశ్ కోసమే సిద్ధం చేస్తున్నారనేది ఫిల్మ్ నగర్ టాక్. అయితే ఈ సినిమాకి పూరి దర్శకత్వం వహించడం లేదట. ఒక కొత్త కుర్రాడు ఈ సినిమా ద్వారా దర్శకుడిగా పరిచయం కానున్నాడని అంటున్నారు. అయితే ఈ సినిమా పూరి సొంత బ్యానర్లో రూపొందుతుందా? లేదంటే మరో నిర్మాత నిర్మిస్తున్నారా? అనే విషయంలోనే క్లారిటీ రావలసి వుంది. త్వరలోనే ఈ ప్రాజెక్టుకి సంబంధించిన పూర్తి వివరాలు తెలియనున్నాయి.