కోన వెంకట్ ను ట్రాల్ చేస్తున్న నెట్ జనులు

Posted: 04/06/2018 08:16 PM IST

కృష్ణ జింకలను వేటాడిన కేసులో బాలీవుడ్ హీరో సల్మాన్ ఖాన్ కు ఐదేళ్ల జైలు శిక్ష పడిన తరుణంలో ఈ అగ్రహీరోకు శిక్ష పడటంపై బాలీవుడ్ నటులు ఇప్పటికే తమ ఆవేదన వ్యక్తం చేశారు. అది సరే కానీ టాలీవుడ్ డైరెక్టర్, రచయిత కోన వెంకట్ ను నెట్ జనులు ఎందుకు విమర్శిస్తున్నారనేగా మీ ప్రశ్న. ఎందుకంటే.. సల్మాన్ కు శిక్ష పడటంపై వెంకట్ స్పందిస్తూ.. ‘ఐ సపోర్ట్ సల్మాన్’ అనే హ్యాష్ టాగ్ తో ట్వీట్ చేశారు. ‘సల్మాన్ కేసులో కోర్టు తీర్పు విని ఆశ్చర్యపోయాను... దోషిగా తేలినంత మాత్రాన సల్మాన్ వ్యక్తిత్వంపై చర్చ జరపాల్సిన అవసరం లేదు ..  పర్యావరణ సమతుల్యతను కాపాడే నిమిత్తం జంతువుల వేటను చాలా దేశాల్లో ప్రభుత్వాలు అనుమతిస్తున్నాయి.. మొదట మనుషులను కాపాడాలి..’ అంటూ కోన వెంకట్ అభిప్రాయపడ్డారు.

కాగా, ఈ పోస్ట్ పై నెటిజన్లు భిన్న వ్యాఖ్యలు చేశారు. ‘నిజమైన మనుషులు తమ సరదా కోసం జంతువులను వేటాడరు’, ‘వన్యప్రాణి సంరక్షణ చట్టాలు చదువుకో ఇంటర్నెట్ లో ఉంటాయి’, ‘మీలాంటి సెలెబ్రిటీల కోసం చట్టాలు, నిబంధనలు మార్చుకోవాలా!!! మా భారతదేశంలో అయితే ఇలాంటివి అనుమతించరు సార్.  కావాలంటే వేరే దేశాలకు మీరు వెళ్లి వేటాడుకోండి’ అంటూ చురకలు అంటించారు.