సీఎన్ఎన్ అవార్డు అందుకున్న బాహుబలి టీమ్

Posted: 12/01/2017 04:21 PM IST

బాహుబలికి మరో అరుదైన గౌరవం దక్కింది. సీఎన్ఎన్ న్యూస్ 18 ఛానెల్ ఏటా ఇచ్చే ఇండియన్ ఆఫ్ ది ఇయర్ అవార్డుకు 2017 సంవత్సరానికి గానూ ఎంపికైంది.

గురువారం రాత్రి జరిగిన కార్యక్రమంలో ఈ చిత్రాన్ని ఇండియన్ ఆఫ్ ది ఇయర్ గా ప్రకటించారు. ఈ సందర్భంగా కేంద్ర ఆర్థిక మంత్రి అరుణ్ జైట్లీ చేతుల మీదుగా నటి రమ్యకృష్ణ, నిర్మాత యార్లగడ్డ శోభులు ప్రతిష్ఠాత్మక అవార్డును అందుకున్నారు. ఈ సందర్భంగా బాహుబలి-3 ఉంటుందా? అన్న ప్రశ్నకు శోభు యార్లగడ్డ సమాధానమిస్తూ.. త్వరలో ఉండకపోవచ్చని.. కానీ, ఎప్పటికైనా తెరకెక్కించి తీరతామని ప్రకటించాడు. ఇక రమ్యకృష్ణ మాట్లాడుతూ, బాహుబలిలో నటించిన అనుభవం జీవితాంతం గుర్తుంటుందని అన్నారు.

సాధారణంగా ఈ అవార్డును వ్యక్తిగతంగా సీఎన్ఎన్ ప్రకటిస్తూ వస్తోంది. కానీ, ఈ ఏడాది బాహుబలి చిత్ర యూనిట్ మొత్తానికి ప్రకటించటం విశేషం. 2015లో ఇదే అవార్డును దర్శకుడు రాజమౌళి అందుకున్నాడు. ఇక ఈ కార్యక్రమానికి కపిల్ దేవ్, కోహ్లీతో పాటు పలువురు రాజకీయ నేతలు, పారిశ్రామికవేత్తలు హాజరయ్యారు.