చైనాలో బాహుబలి రికార్డ్

Posted: 06/14/2016 11:32 AM IST

Bahubali in china highest screens in record

తెలుగు సినిమా ఖ్యాతిని ప్రపంచానికి చాటిచెప్పిన ‘బాహుబలి - ది బిగినింగ్‌’ త్వరలో చైనా ప్రేక్షకులను అలరించడానికి సిద్ధమవుతోంది. భారతదేశం కన్నా ఎక్కువ థియేటర్లలో భారీ స్థాయిలో ‘బాహుబలి’ని విడుదల చేయనున్నట్లు ఆ చిత్ర దర్శకుడు రాజమౌళి తెలిపారు. దిల్లీలో ఓ వార్తా సంస్థతో రాజమౌళి మాట్లాడుతూ ‘‘చైనాలో 6500 తెరల్లో ‘బాహుబలి’సినిమాని విడుదల చేయబోతున్నాం ఇది తెలుగు సినిమాలోనే అరుదైన రికార్డ్ అని అన్నారు. ఇది భారతదేశం కన్నా చాలా ఎక్కువ. ఈ నెలలోనో లేదా వచ్చే నెలలోనో అక్కడ ‘బాహుబలి’ విడుదలవుతుందని'' చెప్పారు.

‘బాహుబలి-ది కంక్లూజన్‌’ గురించి చెబుతూ ‘ప్రస్తుతం బాహుబలి- ది కంక్లూజన్‌ చిత్రీకరణ ప్రారంభమైంది. వచ్చే ఏడాది ఏప్రిల్‌లో ఆ చిత్రాన్ని విడుదల చేస్తాం. మొదటి భాగం విడుదలైన మూడు, నాలుగు నెలల్లో రెండో భాగాన్ని విడుదల చేయాలనుకున్నాం.

అయితే కొన్ని కారణాల వల్ల ఏడాదిన్నర ఆలస్యమవుతోంది. రెండో భాగంపై ప్రేక్షకుల్లో భారీ అంచనాలున్నాయి. ఆ విషయంలో నాకు ఒత్తిడి లేదు. నిజానికి వారి అంచనాలే ఒత్తిడిని దూరం చేస్తున్నాయి. ఇంత విరామం తర్వాత వస్తున్నా రెండో భాగం తప్పక ప్రేక్షకులను ఆకట్టుకుంటుందన్న నమ్మకముందని’ అన్నారు.

- మూర్తి