బాలయ్య... ఆ బాబులు ఎందుకు రాలేదు?

Posted: 04/22/2016 01:54 PM IST

Celebrities who missed balakrishna film launch

నందమూరి బాలకృష్ణ 100వ చిత్రం ‘గౌతమీపుత్ర శాతకర్ణీ’ ప్రారంభోత్సవ కార్యక్రమం నేడు హైదరాబాద్ లోని అన్నపూర్ణ స్టూడియోలో ఘనంగా జరిగింది. ఈ కార్యక్రమానికి తెలంగాణ రాష్ట్ర ముఖ్యమంత్రి శ్రీ కె. చంద్రశేఖర్ రావు ముఖ్య అతిథిగా విచ్చేసి, ముహూర్తపు షాట్ కు క్లాప్ కొట్టారు. అలాగే సినీ ఇండస్ట్రీకి చెందిన కె. రాఘవేంద్రరావు, సింగీతం శ్రీనివాసరావు, మెగాస్టార్ చిరంజీవి, విక్టరీ వెంకటేష్ లతో పాటు పలువురు ప్రముఖులు మరియు బాలయ్య అభిమానులు విచ్చేసారు.

అయితే తన సినిమాకు సంబంధించిన ఎలాంటి కార్యక్రమం జరిగినా కూడా తన బావ, ఆంధ్రప్రదేశ్ ముఖ్యమంత్రి నారా చంద్రబాబు నాయుడుని బాలయ్య తప్పకుండా ఆహ్వానిస్తాడు. అలాంటిది బాలయ్య 100వ సినిమా షూటింగ్ ప్రారంభోత్సవ కార్యక్రమానికి చంద్రబాబు నాయుడు రాకపోవడంతో టిడిపి కార్యకర్తల్లో కాస్త అసంతృప్తి కనిపించింది. చంద్రబాబు నాయుడు ఈ వేడుకకు వచ్చివుంటే ఆ సందడి మరో రేంజులో వుండేదని అక్కడికొచ్చిన వారంతా గుసగుసలాడారు.

ఎందుకంటే అసలే బాలయ్య 100చిత్రం కావడం ఒక కారణమైతే... ఇద్దరూ చంద్రులు(కేసిఆర్, చంద్రబాబు) ఒకే వేదికపై అగ్ర తారలతో(బాలయ్య, చిరంజీవి, వెంకటేష్) కలిసి కనిపిస్తే అటు అభిమానులు, ఇటు ప్రజలకు ఎంతో ఆనందంగా వుండేది. కానీ చంద్రబాబు రాకపోవడంతో కాస్త టిడిపి కార్యకర్తలు నిరాశకు గురయ్యారు. అయితే చంద్రబాబుకు ఆహ్వానం అందిందో లేదో అని టిడిపి కార్యకర్తలు అనుమానం వ్యక్తం చేస్తున్నారు. కానీ చంద్రబాబు రానిలోటును కేసిఆర్ భర్తీ చేసారని చెప్పుకోవచ్చు. కేసిఆర్ తన మాటలతో టిడిపి కార్యకర్తలు, బాలయ్య అభిమానులతో సైతం విజిల్స్ వేయించారు.

ఇక ఈ కార్యక్రమానికి అక్కినేని నాగార్జున మరియు మంచు మోహన్ బాబులు కూడా హాజరు కాలేదు. నాగార్జున మరియు మోహన్ బాబులతో బాలయ్యకు మంచి స్నేహమే వుంది. మరి ఈ కార్యక్రమానికి వీరిద్దరూ ఎందుకు హాజరుకాలేదు? అసలు బాలయ్య వీరికి ఆహ్వానం అందించలేదా? ఈ కార్యక్రమం అన్నపూర్ణ స్టూడియోలోనే జరిగింది.. అలాంటిది నాగార్జునను బాలయ్య ఎందుకు ఆహ్వానించకుండా వుంటాడు? ఒకవేళ నాగార్జున, మోహన్ బాబులకు ఆహ్వానం అందినప్పటికీ.. వేరే ఇతర పనుల వల్ల ఈ కార్యక్రమానికి రాలేకపోయారా? అని అక్కడికి వచ్చినవారితో పాటు ఈ కార్యక్రమాన్ని టీవి ఛానెల్లలో లైవ్ గా చూసినవాళ్లంతా గుసగుసలాడుతున్నారు.