పవన్ ను జోడు గుర్రాల స్వారీ చేయాలంటున్న మెగాస్టార్

Posted: 03/20/2016 11:05 PM IST

Chiranjeevi speech in sardaar gabbarsingh

పవన్ కళ్యాణ్ ట్రెండ్ ఫాలో అవ్వడు... ట్రెండ్ సెట్ చేస్తాడు అని చెప్పుకొచ్చాడు మెగాస్టార్ చిరంజీవి. పవన్ కళ్యాణ్ హీరోగా నటిస్తున్న ‘సర్దార్ గబ్బర్ సింగ్’ ఆడియో విడుదల కార్యక్రమం హైదరాబాద్ లోని నోవాటెల్ లో జరిగింది. ఈ కార్యక్రమానికి ముఖ్య అతిథిగా విచ్చేసిన మెగాస్టార్ చిరంజీవి విచ్చేసి, థియేటర్ ట్రైలర్ మరియు ఆడియో సిడీలను విడుదల చేసారు.

ఈ సంధర్భంగా చిరంజీవి మాట్లాడుతూ... కళ్యాణ్ బాబు నటించిన ‘గబ్బర్ సింగ్’ సినిమాను నేను చాలాసార్లు చూసాను. ‘గబ్బర్ సింగ్’ సినిమాలో చెప్పినట్లుగా పవన్ ట్రెండ్ ఫాలో అవ్వడు.. ట్రెండ్ సెట్ చేస్తాడు. గతంలో వచ్చిన షోలే తరహాలోనే ‘సర్దార్ గబ్బర్ సింగ్’ చిత్రం కూడా బ్లాక్ బస్టర్ హిట్టవడం ఖాయం. పవన్ కళ్యాణ్ అన్ని రకాల అంశాలతో ప్రేక్షకులను అలరిస్తుందనడంలో ఎలాంటి సందేహం లేదు. ఈ సినిమా కోసం మీ అందరితో పాటు నేను కూడా అంతే ఆతృతగా ఎదురుచూస్తున్నాను.

సినిమాల్లోకి రావడానికి ముందు పవన్ కళ్యాణ్ ప్రతి పనిలో కష్టపడి పైకొచ్చాడు. పవన్ కళ్యాణ్ సక్సెస్ లో ముందుగా సంతోషించేది నేనే. అయితే రెండుమూడు రోజులుగా నేను ఓ వార్త విన్నాను.. అదేంటంటే.. రెండు,మూడు సినిమాల తర్వాత పవన్ సినిమాల విషయంలో భవిష్యత్తు గురించి ఆలోచించుకోలేదు అన్నట్లుగా విన్నాను. కానీ ఇది సరైనది కాదు. ఇంతమంది ఆదరిస్తున్న అభిమానులను దూరం చేసుకోవద్దు. నువ్వు(పవన్ కళ్యాణ్) ఎంచుకున్న రెండు రంగాలను(రాజకీయం, సినిమాలు) కూడా విజయవంతంగా కొనసాగించాలని కోరుకుంటున్నాను.

అవకాశం వున్నంత వరకు జోడు గుర్రాల స్వారీ చెయ్యి. కాబట్టి నా మాట కాదని అంటాడని నేను అనుకోవట్లేదు. సినిమా పరిశ్రమలో రికార్డులు బ్రేక్ చేయాలని హీరోల మధ్య మంచి ఆహ్లాదకరమైన పోటీ వుండాలి. ‘బాహుబలి’ రికార్డులను మరొకరు బ్రేక్ చేయాలి. ఒకదానిని మించి మరొకరు రికార్డులు బ్రేక్ చేయాలి. ఆహ్లాదకరంగా వుండాలి.

ఈ సినిమాలో పవన్ కళ్యాణ్ ‘దాయి దాయి దామ వీణ’ స్టెప్ వేసాడని ఆలీ అన్నాడు. ఆ స్టెప్ పవన్ కళ్యాణ్ ఎలా వేసాడన్నది నాకు మీ అందరి(అభిమానులు) కంటే నా ఎక్కువ ఆతృతగా వుంది. ఈ సినిమా 100రోజుల వేడుక చేసుకోవాలి... ఆ ఫంక్షన్ కు నేను కూడా రావాలని కోరుకుంటున్నాను. ఇక సౌత్ ఇండియన్ నంబర్ 1 మ్యూజిక్ డైరెక్టర్ దేవిశ్రీప్రసాద్ అద్భుతమైన సంగీతాన్ని అందించాడు. నా చిత్రానికి సంగీతం అందించాలని అడగటానికి కూడా సమయం ఇవ్వట్లేదు. ఇప్పుడు మీ ముందు చేయడానికి ఒప్పుకున్నాడు.