ఫ్యాన్స్ అత్యుత్సాహం...సినీతారల నిరుత్సాహం

Posted: 12/07/2015 01:22 PM IST

చెన్నై వరద బాధితుల సహాయం కోసం టాలీవుడ్ సినీ ఇండస్ట్రీకి సంబంధించిన పలువురు నటీనటులు విరాళాలు సేకరించడానికి వెళ్లి, అభిమానుల అత్యుత్యాహం వల్ల పరుగో పరుగులు పెట్టేసారు. హైదరబాద్ నగరంలో బాగా రద్దిగా వుండే ఓ ప్రముఖ మాల్ లో విరాళాలను సేకరించడానికి నటీనటులు లక్ష్మీ మంచు, రానా, కాజల్, మధుశాలిని, నిఖిల్, తేజస్వీలు వెళ్లారు.

హీరోహీరోయిన్లు వస్తున్నారని తెలియడంతో వీరిని చూడటానికి అభిమానులు అక్కడికి భారీ సంఖ్యలో తరలివచ్చారు. దీంతో ఆ మాల్ అంతా కూడా జనాలతో కిక్కిరిసిపోయింది. విరాళాల సేకరణ కోసం ఏర్పాటు చేసిన ఆ స్టేజ్ వద్దకు వెళ్లడానికి ఈ తారలకు చాలా సమయం పట్టింది. ఈ నటీనటులను తమ సెల్ ఫోన్లలో బంధించడానికి జనాలు తెగ ప్రయత్నించారు.

జనాలు కట్టడి చేసేందుకు ప్రయత్నించిన నిర్వాహకులు, పోలీసులు, బౌన్సర్లు కూడా చేతులెత్తేసారు. దీంతో జనాల తోపులాట మరీ ఎక్కువ అవుతుండటంతో ఈ నటీనటులంతా పక్కనే వున్న స్టార్ బక్స్ లోకి పరుగులు తీసారు. అక్కడ కాసేపు రెస్ట్ తీసుకొని, ఆ తర్వాత అక్కడి నుంచి వెళ్లిపోయారు. విరాళాలు సేకరించాలనే వారి ప్రయత్నం అంతా కూడా రసభసగా ముగిసిపోయింది.