తలుపు తెరిస్తే పాముకాటుకు బలి: స్వాతి

Posted: 03/18/2014 11:16 AM IST

ఆంధ్రా, తమిళనాడు సరిహద్దులో వున్న సుబ్రహ్మణ్యపురంలోని ఓ పురాతన గుడిని కొన్ని కారణాల వల్ల మూసి వేస్తారు. ఆ గుడిని తెరవాలని ప్రయత్నించిన వారందరూ పాముకాటుకు బలవుతుంటారు.

ఈ గుడిలో జరుగుతున్న అంతుచిక్కని ఘటనల వెనకున్న రహస్యాన్ని ఛేదించడానికి కథానాయకుడు ఎలాంటి సాహసం చేశాడన్నదే ఈ చిత్ర ఇతివత్తం. ఈ క్రమంలో అతని మదిలో ఉత్పన్నమయిన ప్రశ్నలేమిటనేది ఆసక్తికరంగా వుంటుంది. 

అయితే ఆంధ్రా, తమిళనాడు సరిహద్దులో ఉన్న ఓ పురాతన ఆలయంలో ఏం జరిగింది? ఆ గుడి తలుపులు మూసి వుంచడం వెనకున్న రహస్యమేమిటి? ఆలయంలోని మార్మిక శక్తులేమిటి?అనే ఆసక్తికర విషయాలు తెలుసుకోవాలంటే కార్తికేయ చిత్రాన్ని చూడాల్సిందే అంటున్నారు చందు మొండేటి. 

ఆయన దర్శకత్వంలో రూపొందుతున్న చిత్రం కార్తికేయ. నిఖిల్, స్వాతి జంటగా నటిస్తున్నారు. మాగ్నస్ సినిప్రైమ్ ప్రై.లిమిటెడ్ పతాకంపై వెంకట శ్రీనివాస్ బొగ్గారం ఈ చిత్రాన్ని నిర్మిస్తున్నారు. చిత్రీకరణ పూర్తయింది. త్వరలో విడుదల చేయడానికి సన్నాహాలు చేస్తున్నారు. 

-ఆర్ఎస్