‘ఆంధ్రావాలా ’ కాంబినేషన్ ఈసారి అదిరేనా?

Posted: 02/25/2014 05:29 PM IST

ఒకప్పుడు పూరీ జగన్నాథ్ దర్శకత్వంలో ఒక్క సినిమా అయినా చేయాలని అనుకునేవారు స్టార్ హీరోలు. కానీ గత కొంత కాలం నుండి పూరీ తనకు ఇష్టం వచ్చిన స్టోరీలతో సినిమాలు తీసేస్తూ జనాల్ని విసిగించడమే కాకుండా సదరు హీరోల ఖాతాలో ఓ ప్లాప్ సినిమాను పడేయడంతో వారు ఇతనితో నటించడానికి ఆసక్తి చూపించడం లేదు.

ఇటీవల నితిన్ తో తీసిన ‘హార్ట్ ఎటాక్ ’ సినిమా కాస్తంత ఫర్వాలేదనిపించింది. ఇప్పుడు పూరీ తన తరువాతి ప్రాజెక్టు కోసం సన్నాహాలు చేసుకుంటున్నారు. మాములుగా పూరి జగన్నాధ్ మహేష్ బాబు తో సినిమా చెయ్యాలి కానీ ఆ సినిమా పట్టాలెక్కడానికి ఇంకా చాలా సమయం ఉండడంతో పూరి జగన్నాధ్ యంగ్ టైగర్ ఎన్టీఆర్ తో సినిమా చేయడానికి ఉవ్విళ్లూరుతున్నాడు.

గతంలో వీరిద్దరి కాంబినేషన్లో వచ్చిన ‘ఆంధ్రావాలా ’ సినిమా అనుకున్నంత విజయం సాధించకపోవడంతో, ఎలాగైనా ఇతనికి మంచి బ్రేక్ ఇవ్వాలనే పట్టుదలతో పూరీ ఇప్పటికే తారక్ కి స్టోరీ లైన్ చెప్పడం, అది తారక్ నచ్చడంతో గ్రీన్ సిగ్నల్ ఇచ్చాడని సమాచారం. ఎన్.టి.ఆర్ ‘రభస’ షూటింగ్ పూర్తి చేసాక ఈ సినిమా సెట్స్ పైకి వెళ్ళే అవకాశం ఉంది. ఈ సినిమా గురించి పూర్తి వివరాలు త్వరలోనే అధికారికంగా తెలియజేసే అవకాశం ఉంది.