రాజమౌళి సినిమా పేరు మారింది

Posted: 05/20/2013 05:14 PM IST

టాలీవుడ్ లో ఓటమి అంటూ ఎరుగని దర్శకుడిగా పేరు తెచ్చుకున్న దర్శక ధీరుడు రాజమౌళి ఎంతో ప్రతిష్టాత్మకంగా భారీ బడ్జెట్ తో తెరకెక్కించబోతున్న సినిమా ‘బహుబలి ’ అని ప్రకటించిన విషయం తెలిసిందే. ప్రస్తుతం స్క్రిప్టు చివరి వరకు వచ్చిన ఈ సినిమా జూన్ లో సెట్స్ పైకి వెళ్లబోతుంది. అయితే రాజమౌళి ట్విట్టర్లో ప్రకటించిన ‘బహుబలి ’ పేరు మారిందని, ఇది కేవలం వర్కింగ్ టైటిల్ మాత్రమేనని దీనికి అసలు టైటిల్ ని ఖరారు చేసినట్లు చిత్ర యూనిట్ సభ్యుల నుండి అందుతున్న సమాచారం. ఈ వార్తలకు బలం చేకూరే విధంగా ఆ చిత్ర నిర్మాత ఫిలిం చాంబరల్లో ‘మహాబలి ’ అనే టైటిల్ ని రిజిష్టర్ చేయించినట్లు, అదే టైటిల్ ని ఫైనల్ చేసే ఆలోచనలో రాజమౌళి ఉన్నాడని అంటున్నారు. ఈ సినిమాలో ప్రభాస్ రాజ్ పుత్ చక్రవర్తి పృథ్వీరాజ్ చౌహాన్ పాత్రలో కనిపించనున్నట్లు తెలుస్తోంది. ఆయన ప్రియురాలు సంయోగిత పాత్రలో అనుష్క కనిపించనున్నట్లు సమాచారం. ఇక ఈ చిత్రంలో నటీనటుల ఎంపిక ఇంకా జరుగుతూనే ఉంది. ఇప్పటికే కీలక పాత్రల కోసం వివిధ భాషల నుండి మంచి నటుల్ని ఎంపిక చేసుకున్న రాజమౌళి ఇంకా కొన్ని పాత్రల కోసం నటుల్ని ఎంపిక చేస్తూనే ఉన్నారు. కీరవాణి సంగీతం అందిస్తున్న ఈ చిత్రానికి సింథిల్ కుమార్ సినిమాటోగ్రాఫర్ గా పనిచేస్తున్నారు. త్వరలోనే ఈ సినిమా సెట్స్ పైకి వెళ్లనుంది.