Posted: 08/21/2012 08:39 PM IST

       అల్లు అర్జున్ - ఇలియానా జంటగా త్రివిక్రమ్ శ్రీనివాస్ తెరకెక్కించిన 'జులాయి' మూవీ బన్నీకెరీర్ లో నూతన రికార్డులకు నాంది పలికింది. తొలి రోజునే హిట్ టాక్ ను సొంతం చేసుకున్న ఈ మూవీ కలెక్షన్ల పరంపర అప్రతిహతంగా కొనసాగుతోంది. విడుదలై రెండు వారాలు కావొస్తున్నా కలెక్షన్లు ఏ మాత్రం తగ్గకపోవడం బన్నీకి మరింత ఆనందాన్ని ఇవ్వటమేకాక, అతని అభిమానులను ఆనందంతో ఉక్కిరిబిక్కిరి చేస్తోంది. కాగా, రాజకీయాల్లో తీరికలేకుండా ఉన్న కారణంగా ఈ సినిమాని మొన్నటి వరకూ చిరంజీవి చూడలేదు. దాంతో అందరూ మెచ్చుకుంటున్నా ఆ సినిమా చిరంజీవి చూడలేదనే అసంతృప్తి అల్లు అర్జున్ ని వెంటాడిందట. ఈ నేపథ్యంలో ఈ సినిమా విడుదలై రెండు వారాలు కావొస్తుండటంతో, చిరంజీవి స్పెషల్ షో వేయించుకుని చూశారు. ఈ సినిమా చూసిన చిరంజీవి, గతంలో కంటే అల్లు అర్జున్ ఈ సినిమాలో మెరుగైన నటనని కనబరిచాడంటూ అతన్ని అభినందించాడట. ఆ కాంప్లిమెంట్ కోసమే ఎదురు చూస్తోన్న అల్లు అర్జున్, వెంటనే ఈ విషయాన్ని ట్విట్టర్ ద్వారా తెలియజేసి తన ఆనందాన్ని పంచుకున్నాడు.
     ఇదిలా ఉండగా, మెగా అభిమానులకు మరో శుభవార్త. పవన్ కల్యాణ్ 'కెమెరామేన్ గంగతో రాంబాబు' సినిమా అనుకున్న సమయం కంటే ఓ వారం ముందుగా అంటే, అక్టోబర్ 11 న విడుదల కానుంది. మొదట్లో ఈ సినిమాని అక్టోబర్ 18 న విడుదల చేస్తామని దర్శకుడు పూరీ జగన్నాథ్ ప్రకటించారు. అయితే, నిర్మాణ కార్యక్రమాలు మరింత త్వరగా పూర్తి కావస్తున్నందున విడుదల తేదీని ఓ వారం రోజులు ముందుకి తెచ్చారు. గతంలో 'బిజినెస్ మేన్' సినిమా విషయంలో కూడా ఇలాగే జరిగిన సంగతి మనకు తెలిసిందే. ఆ సినిమాని జనవరి 14 న విడుదల చేస్తామని ముందుగా ప్రకటించి, చివరికి జనవరి 11 నే విడుదల చేశారు. 

...avnk