'జానపద ' చిత్రాల రారాజు ఈ నటుడు

Posted: 05/15/2013 12:33 PM IST

యన్ . టీ . ఆర్. , ఏ . యన్ . ఆర్. స్టార్ హీరోలు గా , రఘునాధ్ వంటి వారు రోమ్యాంటిక్ హీరోలుగా కొనసాగుతున్న సమయం అది . అయినా , 'జానపద' చిత్రాలలో నటించాలి అంటే , దర్శక - నిర్మాతలు , ఈ చిత్రాలని చూసే ప్రేక్షకులు సైతం , ఈ హీరోనే ఆ పాత్రలో చూడటానికి మక్కువ చూపే వారు.

ఈ హీరో ఎవ్వరు అని ఆలోచిస్తే , ఒకే పేరు , ఒకే రూపం మనకు వినపడుతుంది , కనపడుతుంది . ఆయనే , కాంతా రావు గారు . ఈ నటుడి గురించి మరికొంత ఇవాల్టి ఆనిముత్యాలలో ...

జానపద కళాకారునిగా కాంతా రావుగారు ఎంతటి పెరునైతే సంపాదించుకున్నారో , పౌరాణిక పాత్రలు పోషించడం లో కూడా అంతటి పేరు - గుర్తింపుని సంపాదించుకున్నారు . ముఖ్యంగా 'నారదుని ' పాత్రలో కాంతా రావు గారి నటన , అనన్య సామాన్యం . పౌరాణిక పాత్రల్లోకేల్లా , త్రిలోక సంచారి , కలహ భోజనుడు అయిన నారద పాత్రను , పోషించడం చాలా కష్టం . నారదుని పాత్రను పోషించడం అంటే , కాంతా రావు గారికి ఎంతో ఇష్టం . మాటల్లో చమక్కులు , చూపుల్లో తళుక్కులు , పదాల్లో విభిన్నతలు , నటనలో , ముఖ కవళికల్లో అవసరం మేరకు విరుపులు , ఇవన్నీ నారద పాత్రలో ఉన్న ప్రత్యేకతలు . ఈ ప్రత్యేకతలని తన నటన ద్వారా ప్రేక్షకుల కళ్ళకు కట్టినట్టుగా చూబించడం లో కాంతా రావు గారు దిట్ట . 'నారదుడు ' అంటే కాంతా రావు , కాంతా రావు అంటే 'నారదుడు' అన్నంతగా ఈ పాత్రకు ప్రాచూర్యం తీసుకొచ్చారు కాంతా రావుగారు . విశ్వ విఖ్యాత నట సార్వభౌమ , యన్ . టీ . ఆర్. ను మనం ఎలా 'రాముడి'గా , 'కృష్ణుడి'గా మన మనస్సులో చెరగని ముద్ర వేసుకున్నామో , అలాగే ప్రేక్షకులు కాంతా రావు గారు కూడా 'నారదుని' పాత్రకు జీవం పోశారు అనడం లో ఏ మాత్రం అతిశయోక్తి లేదు .

ఇక పౌరాణిక పాత్రల విషయానికి వస్తే , 'లవ కుశ' చిత్రం లో లక్ష్మనుడిగా , 'బాల భారతం' లో పాండు రాజు గా నటించి మెప్పించారు , కాంతా రావు గారు . అనేక చిత్రాల్లో 'కృష్ణుడి' పాత్రలో కనిపించి అందరి మన్ననలు అందుకున్నారు ఈ సీనియర్ నటులు . కన్నులలో ప్రసన్నత , నడకలో మృదుత్వం , అవసరం అయినప్పుడు గాంభీర్యత , కృష్ణుడి పాత్ర లక్షణాలు ఇవి . ఇవన్ని సమర్ధవంతంగా తన నటన ద్వారా ప్రదర్శించి , యన్ . టీ . ఆర్. ను కృష్ణుడి గా అంగీకరించిన ప్రేక్షకుల చేత కూడా , 'కృష్ణుడి ' గా జేజేలు పలికించుకున్నారు , కాంతా రావు గారు .

జానపద , పౌరాణిక చిత్రాల్లో ఎన్నో విభిన్నమైన పాత్రలు పోషించి , 'జానపద ' చిత్రాల్లో నటించాలంటే అది కాంతా రావు వల్లే సాధ్యం అవుతుంది అని అందరు అనుకునేంత ఎత్తుకు ఎదిగిన కాంతా రావు గారు , సాంఘిక చిత్రాల్లో కూడా , మరపురాని పాత్రలని పోషించి , అందరి మన్ననలు పొందారు .

ముఖ్యంగా యన్ . టీ . ఆర్ . - సావిత్రి గార్లు అన్నా - చెల్లెళ్ళు గా నటించిన 'రక్త సంబంధం' చిత్రం లో , సావిత్రి గారి భర్త పాత్రలో కాంతా రావు గారి నటన , చిత్రం లో ని ఇతర ముఖ్య పాత్రలు మరింత బాగా ఎలివేట్ అవ్వడానికి ఎంతో దోహదం చేసింది . ఒక తండ్రిగా , ఒక ,సోదరునిగా , ఒక భాగవత్స్వరూపానిగా , ఒక విలన్ గా , ఇలా అనేక డైమెన్షన్స్ ఉన్న పాత్రలను పోషించి , ఇతర హీరోలు స్టార్ హీరోల హోదాలో కొనసాగుతున్న కాలం లోనే , వారందరికీ గట్టి పోటీ ఇచ్చిన ఘనత కాంతా రావు గారిది .

అయితే , దీపం ఉన్నప్పుడే ఇల్లు చక్కబెట్టుకోనందువలనో , లేక ఇతర ఏ ముఖ్య కారణాల వల్ల అయినా కావచ్చు , కాంతా రావు గారు , తనకు వచ్చిన విజయాన్ని , ఇటు పేరు పరంగా , అటు ఆర్ధికంగా కూడా నిలబెట్టుకోలేక , తన తుది రోజుల్లో ఎంతో ఇబ్బంది పడ్డారనే చెప్పాలి ...

సుఖ దుఖాల సమ్మేళనమే జీవితం , ఏది శాస్వతం కాదు కాబట్టి , ఊహించని పరిణామాలకు , ముందుగానే సిద్ధంగా ఉండాలి అని , కాంతా రావు గారి జీవితం తెలుసుకున్న అందరికీ అర్ధం అయ్యే విషయం .