అర్కేనగర్ ఉపఎన్నిక బరిలో హీరో విశాల్..?

Posted: 12/01/2017 05:02 PM IST

తమిళ రాజకీయాల్లో మరో సంచలనకరమైన వార్త ప్రస్తతుం జోరందుకుంది. తమిళనాడు నిర్మాతల మండలి అధ్యక్షుడు, నడిగార్ సంఘం ప్రధాన కార్యదర్శి, కాలీవుడ్ యువ హీరో విశాల్‌ రెడ్డి ఇప్పటికే సినీమా రాజకీయాలలో ఎంట్రీ ఇచ్చి సంచలనాలకు తెరలేపిన నేపథ్యంలో ఆయన ఇక నేరుగా తమిళ రాజకీయాల్లోకి కూడా ఎంట్రీ ఇస్తున్నారన్న వార్త ప్రస్తుతం తమిళనాడు వ్యాప్తంగా సంచలనంగా మారింది.

తమిళనాడు దివంగత ముఖ్యమంత్రి జయలలిత మరణంతో ఖాళీగా మారిన అర్కే నగర్ అసెంబ్లీ నియోజకవర్గానికి ఉప ఎన్నికలు జరుగుతున్న క్రమంలో విశాల్ కూడా బరిలో నిలుస్తారని తమిళ మీడియా నుంచి అందుతున్న వార్తలు ప్రస్తుతం చర్చనీయాంశంగా మారాయి. అంతేకాదు కొత్త పార్టీ నెలకొల్పి 2021 ఎన్నికల్లో మొత్తం 234 స్థానాల్లో పోటీ చేసేందుకు సిద్ధమౌతున్నాడని కూడా వార్తలు వినబడుతున్నాయి.

ప్రస్తుతం స్వతంత్ర్య అభ్యర్థిగా విశాల్‌ బరిలో దిగే అవకాశాలున్నాయన్న వార్తలు కూడా వినబడుతున్నాయి. ఆర్కే నగర్‌ ఉపఎన్నికకు సోమవారం విశాల్ నామినేషన్ కూడా దాఖలు చేయనున్నారని వార్తలు హల్ చల్ చేస్తున్నాయి. కాగా విశాల్ కు కమల్ హాసన్ కూడా మద్దతు తెలుపుతున్నారని సమాచారం. ఇదిలావుండగా, విశాల్ సన్నిహిత వర్గాలు మాత్రం ఈ వార్తలను తోసిపుచ్చుతున్నాయి. ఇప్పటికే బిజీగా వున్న విశాల్ రాజకీయాల్లోకి రారని వారు వాదిస్తున్నారు.