ఆఆపాను ప్రతిపాదించటంలేదన్న అమీర్ ఖాన్

Posted: 03/28/2014 03:19 PM IST

భారత ఎన్నికల సంఘం తరఫున నేషనల్ ఐకాన్ గా వోటర్లలో చైతన్యాన్ని కలిగించే విధంగా పనిచేస్తున్న హిందీ నటుడు అమీర్ ఖాన్ తాను ఆమ్ ఆద్మీ పార్టీ నాయకుడు అరవింద్ కేజ్రీవాల్ ని ప్రతిపాదించటం లేదని ఎన్నికల కమిషన్ కి లిఖితపూర్వకంగా తెలియజేస్తూ, అటువంటి నిరాధారమైన అసత్యాలను ఖండిస్తూ బాధ్యులైన వారి మీద చర్యలు తీసుకోవలసిందిగా కోరారు.

సోషల్ మీడియాలో, తాను అమీర్ ఖాన్ ఆమ్ ఆద్మీ పార్టీ కి వోటు వేస్తానని ప్రకటిస్తున్నట్లుగా ఉన్న ఫొటో సర్క్యులేట్ అవుతోంది.  అందులో మాజీ రాష్ట్రపతి ఏపిజె అబ్దుల్ కలామ్, క్రికటర్ కపిల్ దేవ్, నటుడు మోహన్ లాల్ ఫోటోలు కూడా ఉన్నాయి. 

అమీర్ ఖాన్ తరఫున ఇచ్చిన ప్రకటనలో, అమీర్ ఖాన్ మొదట నుంచీ కూడా ఏ రాజకీయ పార్టీ తరఫునా ప్రచారం చెయ్యనని, ఏ రాజకీయ పార్టీకీ మద్దతునివ్వనని చెప్తూవచ్చారు అని ఉంది.

జనవరిలో ఒక టివి ఛానెల్ లో మాట్లాడుతూ, ఆమ్ ఆద్మీ పార్టీ కొత్త విధానం వస్తోందని, కానీ ఎన్నికల హామీలను పూర్తి చేసేంతవరకూ తాను ఏ పార్టీ విషయంలోనూ మద్దతుగా మాట్లాడనని అమీర్ ఖాన్ అన్నారు.

-శ్రీజ