ఏపికి ప్రత్యేక హోదా రావాల్సిందే: వెంకయ్య నాయుడు

Posted: 11/27/2015 01:19 PM IST

ఏపికి ప్రత్యేక హోదా పై మరోసారి పార్లమెంట్ వేదికగా ఓ గళం వినిపించింది. కేంద్ర మంత్రి ఎం. వెంకయ్య నాయుడు ఏపికి ప్రత్యేక హోదా రావాల్సిందేనని పార్లమెంట్ లో అందరి సమక్షంలో వెల్లడించారు. ఏపీకి రెవెన్యూ లోటు ఉన్నందునే హోదా కావాలని ప్రజలు కోరుతున్నారని, అలా కోరుతున్నవారిలో తాను కూడా ఉన్నానని స్పష్టం చేశారు. హోదా వస్తేనే రాష్ట్ర అభివృద్ధి త్వరితగతిన సాగుతుందని ప్రజలు నమ్ముతున్నారని తెలిపారు. రాష్ట్రానికి ప్రత్యేక హోదా అంశం నీతి ఆయోగ్ పరిశీలనలో ఉందని వెల్లడించిన ఆయన, ఏపీ అభివృద్ధికి, విభజన హామీల అమలుకు కేంద్రం కట్టుబడి ఉందని పేర్కొన్నారు.

అభివృద్ధి చెందిన పంజాబ్ వంటి రాష్ట్రాలు కూడా ప్రత్యేక హోదాను అడుగుతున్నాయని గుర్తు చేసిన ఆయన, మరెన్నో రాష్ట్రాలు అదే డిమాండ్ ను తెరపైకి తెస్తున్నాయని తెలిపారు. ఈ విషయంలో పట్టుదలకు పోకుండా, దేశ సమగ్ర అభివృద్ధిని దృష్టిలో పెట్టుకుని రాష్ట్రాలు బాధ్యతాయుతంగా వ్యవహరించాలని సూచించారు. కాగా గత కొంత కాలంగా ఏపి సిఎం నారా చంద్రబాబు నాయుడు ప్రత్యేక హోదా మీద గ్రౌండ్ వర్క్ చేస్తున్నట్లు వార్తలు కూడా వచ్చాయి. తెలుగు వారికి తన వంతు సహకారాన్ని అందించేందుకు కృషి చేస్తానని కేంద్రమంత్రి వెంకయ్య నాయుడు ముందు నుండి కూడా అంటున్నారు. తాజాగా మరోసారి పార్లమెంట్ వేదికగా వెంకయ్య నాయుడు ప్రత్యేక హోదా మీద మాట్లాడటంతో ఏపిలో ప్రజలకు కొత్త భరోసా లభిస్తుందేమో చూడాలి.