రాజకీయ సుస్థిరత కోసమే సభ్యులను కలుపుకున్నాం : కేసీఆర్

Posted: 03/14/2018 02:56 PM IST

రాజకీయ సుస్థిరత సాధించటం కోసమే మిగతా పార్టీల సభ్యులను తాము కలుపుకున్నామని తెలంగాణ ముఖ్యమంత్రి కేసీఆర్ తెలిపారు. తెలంగాణ బడ్జెట్ సమావేశాల్లో భాగంగా బుధవారం అసెంబ్లీలో కేసీఆర్ ప్రసంగించారు.

తెలంగాణ సాధన ఎంత ముఖ్యమే.. రాజకీయ సుస్థిరత కూడా అంతే ముఖ్యమని భావించామని, అంతేగానీ ఫిరాయింపులు తమ ప్రధాన ఉద్దేశం కాదని ఆయన వెల్లడించారు. టెండర్లలో అవినీతి జరుగుతుందని ప్రతిపక్షాలు ఆరోపిస్తున్నాయని.. కానీ, వాటిని నిరూపించలేకపోయానని ఆయన అన్నారు.

తెలంగాణ రాష్ట్రం ఏర్పాటైన తర్వాత టిఆర్ఎస్ ఉంటుందా అంటూ కొందరు కాంగ్రెస్ నేతలు అవహేళన చేశారని తెలంగాణ సీఎం కెసిఆర్ చెప్పారు. తెలంగాణకు చెందిన కొందరు కాంగ్రెస్ నేతలు ఇంకా ఘోరంగా మాట్లాడారని కెసిఆర్ గుర్తు చేసుకొన్నారు. ఆనాడు తమ పార్టీకి చెందిన ఎంపీ విజయశాంతిని కాంగ్రెస్ పార్టీలో చేర్చుకొన్నారని కెసిఆర్ చెప్పారు. ప్రస్తుతం విజయశాంతి ఎక్కడుందన్నారు. విజయశాంతిని అడవులకు పంపారని వ్యంగ్యాస్త్రాలు సంధించారు.

తెలంగాణను అభివృద్ధి చేసుకోవటమే లక్ష్యంగా టీఆర్ఎస్ శ్రేణులు పని చేస్తున్నాయన్నారు. గతంలో సచివాలయంలో పైరవీ ముఠాలు యథేచ్ఛగా ఉండేవని.. ఇప్పుడు ఎలాంటి అవినీతి కనిపించటం లేదన్నారు.

* మిషన్ కాకతీయ కింద 17 వేల చెరువులు బాగుపడ్డాయని తెలిపారు
* పరిశ్రమలకు 15 రోజుల్లోనే అనుమతులు ఇస్తున్నాం.
* చాలా అభివృద్ధి కార్యక్రమాలను సమర్థవంతంగా నిర్వహిస్తున్నాం.
* తెలంగాణలో ప్రజలు సంతృప్తిగా ఉన్నారు.