అమరావతి మరో హైదరాబాద్ కాకూడదు : పవన్

Posted: 10/17/2015 01:55 PM IST

Pawan kalyan interesting comments on amaravathi hyderabad cities

ఏపీ ప్రభుత్వం ఎంతో ప్రతిష్టాత్మకంగా చేపడుతున్న రాజధాని ‘అమరావతి’ శంఖుస్థాపన కార్యక్రమాన్ని అంగరంగ వైభవంగా నిర్వహిస్తోంది. ఈ నేపథ్యంలో జపాన్, సింగపూర్, దేశ ప్రధానమంత్రులతోపాటు కేంద్రమంత్రులు, ఇతర నేతలు, కొందరు ప్రముఖుల్ని ప్రభుత్వం ఆహ్వానిస్తోంది. ఇందులో భాగంగా జనసేనాధిపతి, పవర్ స్టార్ పవన్ కల్యాణ్ ని కూడా ఏపీ మంత్రులు ఆహ్వానించారు. నవ్యాంధ్రప్రదేశ్ నూతన రాజధాని ‘అమరావతి’ శంకుస్థాపనకు హాజరుకావాలని ఏపీ మంత్రులు ఆయనకు ఆహ్వాన పత్రికను అందించారు. ఈ సందర్భంగా పవన్ మీడియాతో మాట్లాడుతూ పలు ఆసక్తికరమైన వ్యాఖ్యలు చేశారు.

అమరావతి మరో హైదరాబాదు కాకూడదని వ్యాఖ్యానించిన ఆయన గతంలో చేసిన తప్పులు పునరావృతం కారాదని కోరుకున్నారు. రాజధాని లేకుండా రాష్ట్రాన్ని విడగొట్టారని పవన్ ఆవేదన వ్యక్తం చేశారు. రెండు తెలుగు రాష్ట్రాలు సుహృద్భావ వాతావరణంలో మెలగాలన్నారు. ఒకరిపై మరొకరు ఎల్లకాలం ద్వేషం కొనసాగించలేరని కూడా ఆయన అన్నారు. అమరావతి శంకుస్థాపనకు హాజరు కావాలని తనకూ ఉందని పవన్ కల్యాణ్ చెప్పారు. అయితే తన తాజా చిత్రం షూటింగ్ షెడ్యూల్ ఇందుకు అనుమతించాల్సి ఉందని ఆయన వ్యాఖ్యానించారు. ప్రస్తుత షెడ్యూల్ ను ముగించుకుని తదుపరి షెడ్యూల్ కోసం గుజరాత్ వెళుతున్నామని తెలిపారు. అక్కడి షూటింగ్ పరిస్థితులపైనే తాను శంకుస్థాపనకు హాజరయ్యే అంశం ఆధారపడి ఉందన్నారు. తనకు మాత్రం శంకుస్థాపనకు హాజరు కావాలనే ఉందని చెప్పారు. ఇక ఏపీ ప్రభుత్వానికి సలహాలిచ్చేంత అనుభవం తనకు లేదని పవన్ అన్నారు.