జగన్ కంటే కేటీఆరే ఎంతో బెస్ట్!

Posted: 10/15/2015 06:51 PM IST

టీడీపీ, టీఆర్ఎస్ పార్టీల మధ్య వైరుధ్యాలు ఎంతటి స్థాయిలో ప్రత్యేకంగా చెప్పుకోవాల్సిన అవసరం లేదు. నిత్యం ఏదో ఒక అంశంపై విమర్శలు చేసుకోవడమే ఆ రెండు పార్టీల నేతలు పనిగా పెట్టేసుకున్నారు. అలాంటిది ఇప్పుడు ఒకరిపై మరొకరు విమర్శలు చేసుకోకుండా సఖ్యతగా నడుస్తున్నట్లు కనిపిస్తోంది. ప్రస్తుతం ఆంధ్రరాష్ట్రంలో రాజధాని శంఖుస్థాపనకు సంబంధించిన పనులు జరుగుతున్న నేపథ్యంలో.. ఇరురాష్ట్రాల మంత్రులు దగ్గరతున్నట్లు తెలుస్తోంది. ఇప్పటికే కేటీఆర్ కూడా తనని ఆహ్వానిస్తే కచ్చితంగా రాజధాని శంఖుస్థాపనకు వెళ్తానని ప్రకటించిన విషయం తెలిసిందే! దీంతో.. ఏపీ మంత్రులు ఆయనపై ప్రశంసలు కురిపిస్తున్నట్లు తెలుస్తోంది. ఇందుకు ఉదాహరణగా.. టీడీపీ నేత సోమిరెడ్డి చంద్రమోహన్ రెడ్డి చేసిన వ్యాఖ్యలనే తీసుకోవచ్చు.

ఏపీ ప్రతిపక్ష నేత వైఎస్ జగన్ తాను రాష్ట్ర రాజధాని శంఖుస్థాపనకు హాజరు కానని స్పష్టం చేసిన నేపథ్యంలో.. సోమిరెడ్డి ఆయనపై నిప్పులు చెరిగారు. ఈ నేపథ్యంలో జగన్ కంటే కేటీఆర్ బెస్ట్ అంటూ కితాబిచ్చారు. తొలుత జగన్ పై సోమిరెడ్డి నిప్పులు చెరుగుతూ.. రాష్ట్ర రాజధానికి శంఖుస్థాపన జరగడాన్ని కూడా జగన్ అడ్డుకునేందుకు ప్రయత్నిస్తున్నారని ఆరోపించారు. ముఖ్యమంత్రితర్వాత అంతటి స్థానం (ప్రతిపక్ష నేత)లో వున్న వ్యక్తిలా జగన్ ప్రవర్తించడం లేదని, అతని వ్యక్తిత్వం చిన్నపిల్లాడిలా తలపించే విధంగా వుందని ఎద్దేవా చేశారు. శంఖుస్థాపనకు హాజరు కాలేనని జగన్ ప్రకటించడాన్ని ఆయన తప్పు పట్టారు. ఈ క్రమంలోనే తెలంగాణ మంత్రి కేటీఆర్ గురించి మాట్లాడుతూ.. అమరావతి శంఖుస్థాపనకు ఆహ్వానిస్తే తాను తప్పకుండా హాజరవుతానని చెప్పిన సంగతిని గుర్తు చేశారు. ఇరు రాష్ట్రాల మధ్య సమస్యలున్నప్పటికీ.. కేటీఆర్ వస్తానన్నారని.. జగన్ కంటే ఆయనే బెస్ట్ అని సోమిరెడ్డి అన్నారు.

వైఎస్ ముఖ్యమంత్రిగా వున్నప్పుడు సెజ్ ల పేరుతో వేలాది ఎకరాలను రైతుల నుంచి లాక్కున్నారని, అలాంటి వ్యక్తులకు అమరావతి గురించి మాట్లాడే హక్కులేదని విమర్శించారు.రాజకీయంగా ఎన్నో వైరుధ్యాలున్నప్పటికీ.. కొన్ని విషయాల్లో కలిసి ముందుకు పోవాల్సి వుంటుందని సోమిరెడ్డి సూచించారు.

AS