దేనికైనా రె‘ఢీ’ : సీఎం కేసీఆర్

Posted: 03/09/2015 01:45 PM IST

తెలంగాణ అసెంబ్లీ సమావేశాలు వాడీవేడిగా జరుగుతున్నాయి. శనివారం సభలో జాతీయగీతం పాడే సమయంలో కొంతమంది ఎమ్మెల్యేలు బెంచీలపై నిలబడి నిరసన వ్యక్తం చేసిన విషయంపై సీఎం కేసీఆర్ ఆగ్రహం వ్యక్తం చేశారు.

జాతీయగీతానికి అవమానం విషయంలో టీటీడీపీ సభ్యుల సస్పెన్షన్, కాంగ్రెస్ ఎమ్మెల్యే సంపత్ కుమార్ క్షమాపణ అనంతరం సభలో ప్రసంగించిన కేసీఆర్.. తాను సభలో ఏ అంశంపై అయినా, ఎంతసేపయినా చర్చకు సిద్ధంగా వున్నానని ప్రకటించారు. జాతీయ గీతం పట్ల అవమానకరంగా వ్యవహరించిన వారిలో అధికార పార్టీ సభ్యులున్నా ఉపేక్షించేది లేదని కూడా ఆయన స్పష్టం చేశారు.

అలాగే.. తెలంగాణ ఆత్మగౌరవాన్ని కాపాడుకోవడం కోసం తాను ఏం చేయడానికైనా సిద్ధమేనని ఆయన ప్రకటించారు. సభాకార్యక్రమాలను జగరనివ్వబోమని ప్రతిపక్షాలు చెబుతున్నాయని చెప్పిన ఆయన.. సభను జరిపి తీరుతామంటూ తేల్చిచెప్పారు. అవసరమైతే విపక్షసభ్యులను ఎన్నిసార్లు సస్పెండ్ చేయడానికైనా వెనుకాడేది లేదని అన్నారు. తెలంగాణ ఆత్మగౌరవాన్ని ఎవరు భంగం కలిగించినా సహించేది లేదని కేసీఆర్ స్పష్టం చేశారు.