కోడి గుడ్డు పగిలింది-కావూరికి కాలింది?

Posted: 12/17/2013 05:13 PM IST

కావూరికి సమైక్య సెగతో బాగా కాలింది. దీంతో మంత్రిగారు కేకలు పెట్టారు. గతంలో మంత్రి కావూరి సాంబశివరావు గారు పచ్చి సమైక్యవాది. పదవి రాకముందు ఆయన శరీరంలో ఎక్కడ గిల్లిన .. సమైక్య రాగం వినిపించే. కానీ అమ్మ అనుగ్రహించి, బట్టలు నేసే వారి మీద (జౌళి శాఖ) మంత్రిగా నియమించింది. అంతే అదే పెద్ద వరంగా భావించి, అమ్మ మాటలకు లోపడిపోయి, సమైక్యరాగాన్ని అటకెక్కించాడు. ఎవరైన సమైక్యవాదులు కనిపిస్తే చాలు.. జై సమైక్యాంద్ర అంటూ , ఒకటి రెండు సార్లు జై కోడుతూ.. ఏలూరికి, ఢిల్లీకి చకర్లు కొడుతున్నాడు.. అయితే రాష్ట్ర విభజనను అడ్డుకోవటంలో విఫలమైన కావూరి పై సీమాంద్ర ప్రజలు ఆగ్రహంతో ఉన్నారు. కావూరి రాక కోసం ఆ ఊరి ప్రజలు ఆశగా ఎదురుచూస్తున్నారు.

 

కొంతమంది సమైక్యవాదులు కావూరి కోసమే కోడి గుడ్లు డజన్లు డజన్లు కొని పెట్టున్నారు. అంటే కోడి గుడ్డు రేటు రోజు రోజకి ధర పెరుగుతుంది కాబట్టి.. ముందుగా గానే సమైక్యవాదులు కోడిగుడ్లు కొనిపెట్టుకున్నారు. మంత్రిగారు ఎప్పుడు వస్తే అప్పుడు కోడి గుడ్లతో స్వాగతం పలకటానికి సిద్దంగా ఉన్నారు. అయితే ఈరోజు కావూరి అధికార కార్యక్రమంలో పాల్గొనేందుకు పశ్చిమ గోదావరి జిల్లా చింతలపూడికి విచ్చేశారు. ఈ విషయం తెలుసుకున్న సమైక్యవాదులు కావూరి పై దాడి చేశారు. కావూరి పర్యటనను సమైక్యవాదులు అడ్డుకుని... ఆయన వాహనంపై కోడిగుడ్లతో దాడి చేసి... వ్యతిరేకంగా పెద్ద పెట్టున నినాదాలు చేశారు. అంతే కావూరికి ఎక్కడో కాలిపోయింది. వెంటనే సమైక్యవాదులు వట్టి వెధవలు, చేతకానివారంటూ కావూరి సాంబశివరావు తన నోటి దురుసును ప్రదర్శించారు.

 

సమైక్యవాదులు మాత్రం కావూరి మాటలకు ఇంకా రెచ్చిపోయి, కోడి గుడ్లతో మరోసారి దాడి చేయటం జరిగింది. కావూరి మంత్రి పదవికి రాజీనామా చేయకుండా, తాత్సరం చేయడం వల్లే కేంద్రం విభజన విషయంలో ముందుకు వెళ్తుందని సమైక్యవాదులు ఆరోపించారు. దాంతో తీవ్ర ఆగ్రహంతో ఊగిపోయిన కావూరి ... సమైక్యవాదులపై ఇష్టం వచ్చినట్లు తిట్ల దండకం అందుకున్నారు. కావూరి పడుతున్న ఇబ్బందులను పోలీసులు గమనించి వెంటనే రంగంలోకి దిగి సమైక్యవాదులపై లాఠీచార్జీ చేశారు. దీంతో పోలీసులు, సమైక్యవాదుల మధ్య ఘర్షణ వాతావరణం నెలకొంది. సమైక్యవాదులను అరెస్ట్ చేసి పోలీసు స్టేషన్ కు తరలించారు. సమైక్య సెగ నుండి తప్పించుకున్న కావూరి తిన్నగా ఇంటిబాట పట్టారు.