నన్నూఅలాగే చంపేస్తారేమో: రాహుల్

Posted: 10/23/2013 05:44 PM IST

కాంగ్రెస్ ఉపాద్యక్షుడు రాహుల్ గాంధీకి కొత్త భయం పట్టుకుంది. తనను కూడా అలాగే చంపేస్తారేమో అనే భయం రాహుల్ గాంధీని వెంటాడుతున్నదనే విషయాన్ని ఆయనే చెప్పటం విశేషం. రాహుల్ గాంధీ నాయనమ్మ, ఆయన తండ్రి రాజీవ్ గాంధీల మరణం గురించి మనకు తెలుసు. కానీ రాహుల్ గాంధీ లో అప్పటి నుండి రగులుతున్న భయం గురించి ఎవరికీ తెలియదు. రాహుల్ గాంధీ రీసెంట్ గా విషయాన్ని బయటపెట్టారు. ఏదో ఒకరోజు చంపేస్తారేమోనని రాహుల్ గాంధీ అన్నారు. విద్వేష రాజకీయాలు దేశ లౌకికతత్వాన్ని దెబ్బతీస్తున్నాయని ఆయన ఆవేదన వ్యక్తం చేశారు. బీజేపీ మతతత్వ రాజకీయాలకు పాల్పడుతోందంటూ మండిపడ్డారు.

 

ఉత్తరప్రదేశ్ లో మతఘర్షణలు జరిగిన ముజఫర్ నగర్ ప్రాంతంలో తాను పర్యటించినప్పుడు హిందూ ముస్లింలు ఇద్దరితోనూ మాట్లాడానని, వాళ్ల మాటల్లో తన సొంత జీవితగాధే కనిపించిందని చెప్పారు. ''వాళ్ల దుఃఖంలో నా ముఖమే కనిపించింది. ముజఫర్ నగర్ లో మంటలు పెట్టారు, గుజరాత్ లో మంటలు పెట్టారు, ఉత్తరప్రదేశ్, కాశ్మీర్.. అన్నిచోట్లా ఇదే చేస్తున్నారు. వాళ్లు మంటలు పెడితే మేం ఆర్పాల్సి వస్తోంది. ఇది దేశాన్ని నాశనం చేస్తోంది'' అని రాహుల్ గాంధీ ఆవేశంగా బీజేపి పార్టీ ఉద్దేశించి అన్నారు.

 

ఇలాంటి రాజకీయాలు ఆగ్రహావేశాలకు దారితీసి హింసాత్మక ఘటనలలో అమూల్యమైన ప్రాణాలు పోతున్నాయని చెప్పారు. ''మా నాయనమ్మ హత్యకు గురైంది. మా నాన్ననూ హతమార్చారు. బహుశా ఏదో ఒకరోజు నన్ను కూడా చంపేస్తారేమో. అయినా దాని గురించి నేను బాధపడట్లేదు. నా గుండెల్లో ఏముందో మీకు చెప్పాలి'' అన్నారు.

 

ఇటీవల పంజాబ్ కు చెందిన ఓ ఎమ్మెల్యే తన వద్దకు వచ్చారని, 20 ఏళ్ల క్రితం కలిసుంటే మిమ్మల్ని కూడా కోపంలో చంపేసి ఉండేవాళ్లమేమోనని ఆయన అన్నారని రాహుల్ తెలిపారు. బీజేపీ నాయకులు స్వార్థ ప్రయోజనాల కోసం ప్రజలను ఇబ్బంది పెడుతున్నారని విమర్శించారు. ఇలాంటి విషయాణ్ని రాహుల్ గాంధీ ఇప్పుడెందుకు బయట పెట్టారో కాంగ్రెస్ నాయకులే అర్థం కావటంలేదు.