టీడీపీ కండువాలో పవన్... పార్టీలో చేరుతాడా ?

Posted: 10/21/2013 11:30 AM IST

సినీ తారలు సినీ కెరియర్ తరువాత సెకండ్ ఇన్నింగ్స్ గా రాజకీయాలను ఎంచుకోవడం సర్వసాధారణం అయిపోయింది. సినీ కెరియర్ ఊపులో ఉండగానో, పీక్ స్టేజికి వచ్చాకనో ఏదో పార్టీలో చేరిపోవడం లేదంటే రాజకీయ పార్టీ పెట్టడం ఇప్పటి వరకు చూస్తూనే ఉన్నాం. ఇప్పటికే చాలా మంది మన తెలుగు హీరోలు రాజకీయాల్లో ఉండగా ఇఫ్పుడు టాలీవుడ్ లో హాట్ టాపిక్ మాత్రం పవన్ కళ్యాణ్ గురించే. గత కొంత కాలం నుండి ఈయన రాజకీయాల్లో రీఎంట్రీ ఇవ్వబోతున్నాడనే వార్తలు హల్ చల్ చేస్తున్నాయి.

గతంలో తన అన్న పార్టీ పీఆర్పీలో ఉండి, ఆ పార్టీ విలీనం తరువాత రాజకీయాలకు దూరంగా ఉంటున్న పవన్ బీజేపీలోకి గానీ, టీడీపీ పార్టీలో గానీ చేరబోతున్నాడని, దానికి సంబంధించిన చర్చలు కూడా జరిగాయని ఇలా వెబ్ మీడియాలో వార్తలు వస్తున్నాయి. ఎప్పుడో గానీ మీడియా మందు కనిపించని పవన్ ఈ వార్తల పై ఇప్పటి వరకు స్పందించలేదు. కానీ ఇటీవలే ‘అత్తారింటికి దారేది ’ సినిమా ‘ధ్యాంక్స్ మీట్ ’ లో సమాజం మీద, ఈ దేశం పై ఉన్న ప్రత్యేకమైన శ్రద్దను తన మాటల ద్వారా వినిపించాడు. దాని తరువాత రాజకీయల్లోకి వస్తున్నాడనే వార్తలకు మరింత బలం చేకూరింది.

వాటి సంగతి ఎలా ఉన్నా... ప్రస్తుతం అంతర్జాలం (ఇంటర్ నెట్ ) లో పవన్ కళ్యాణ్ టీడీపీ నేత గెటప్‌లో ఓ ఫొటో ఒకటి ఇంటర్నెట్‌లో హల్‌చల్‌ చేస్తోంది. టిడిపి ‘కండువా ’ కప్పుకున్న ఈ  ఫోటో  ఎవరో ఔత్సాహిక కార్యకర్తలు టాలెంట్ ని ఉపయోగించి మార్పింగ్ చేసిందే అయినా, ఈ ఫోటో కాస్త టీడీపీ శ్రేణుల్ని కలవరానికి గురి చేస్తుంది. మొన్నా మధ్య వైయస్సార్ కాంగ్రెస్ పార్టీకి చెందిన జూనియర్ ఎన్టీఆర్ అభిమానులు ఫ్లెక్సీల పై జూనియర్ ఎన్టీఆర్ బొమ్మ, మహేష్ బొమ్మ వేసి హల్ చేసిన విషయం తెలిసిందే.

ఇలా ఆ పార్టీకి బాగా పాపులారిటీ రావడమే కాకుండా టీడీపీని దెబ్బకొట్టడానికి ఆడిన చిన్న మైండ్ గేమ్ బాగా వర్కవుట్ కావడంతో ఇప్పుడు అలాంటి ట్రిక్స్ నే ఇక్కడ ప్లే చేస్తున్నారేమో అని అంటున్నారు. ఇక్కడ ముఖ్యమైన విషయం ఏంటంటే చిరంజీవి రాజకీయాల్లోకి వచ్చాక బాలయ్యకు చిరుకు మాటల యుద్దం జరిగింది. సందులో సందుగా టీడీపీ వారు పవన్ పై కూడా వ్యాఖ్యలు చేసిన దాఖలాలు ఉన్నాయి. అలాంటిది పవన్ టీడీపీలో చేరుతారా అనేది డౌట్.

ఒక వేళ వచ్చినా తెలుగు తమ్ముళ్ళు పవన్ ని ఆహ్వానిస్తారా ? అని కొంత మంది అంటుంటే... మరి కొంత మంది టీడీపీ శ్రేణులు పార్టీకి పవన్ లాంటి సినీ గ్లామర్ ఉన్న వ్యక్తి అయితే ప్లస్ అవుతుందని, దాని ద్వారా ఓటు బ్యాంకును కొల్లగొట్టవచ్చనే అభిప్రాయాన్ని వక్తం చేస్తున్నారు. పవన్ టీడీపీలో చేరుతాడా ? అన్నయ్యను ఎదిరించి కొత్త పార్టీ పెడతాడా ? అన్నది ముందు ముందు తెలుస్తుంది.