కమల్ తో విలన్ వేశాలేయిస్తున్నారు

Posted: 10/09/2013 10:59 AM IST

కళాకారుడు అనే పదానికి నిలువెత్తు నిదర్శనం కమల్. నటనకు గత మూడు దశాబ్దాలుగా పూర్తి న్యాయం చేస్తూ, తన విలక్షణమైన నటనతో ప్రేక్షకుల్ని ఆరు పదుల వయస్సులో కొత్త కొత్త ప్రయోగాలతో అలరిస్తున్న కమల్ హాసన్ ఇప్పుడు మరో సంచలనానికి సిద్ధం అవుతున్నాడు. మొన్నటికి మొన్న ప్రేక్షకులకు విశ్వరూపం చూపించన ఆయన దానికి సీక్వెల్ కూడా తీస్తున్నాడు. ప్రస్తుతం ఆ సినిమాలో బిజీగా ఉన్న కమల్ తరువాత ప్రముఖ దర్శక, నిర్మాత అయిన లింగుస్వామితో ఓ చిత్రానికి కమీట్ అయిన సంగతి తెలిసిందే.

ఇప్పటికే ఈ సినిమాకు దర్శకుడు ఎవరనే సందేహం ఉండేది. కానీ ఈ చిత్రానికి కమల్ ప్రాణ స్నేహితుడు అయిన రమేష్ అరవింద్ దర్శకత్వం వహించబోతున్నాడు. గతంలో సతీ లీలావతి, పంచతంత్రం చిత్రాల్లో కమల్ తో నటించిన రమేష్ అరవింద్ కమల్ కోరిక మేరకే ఈ బాధ్యతలను స్వీకరించాడని తెలుస్తుంది. భారీ బడ్జెట్ తో రూపందబోయే ఈ సినిమాలో యాక్షన్, కామెడీతో సన్నివేశాలు ఉంటాయని చెబుతున్నాడు రమేష్. కమల్ చిత్రానికి దర్శకత్వం వహించడం గురించి రమేష్ అరవింద్ మాట్లాడుతూ కమల్‌హాసన్ నటించే చిత్రానికి దర్శకత్వం వహించడం ఓ వైపు సంతోషాన్ని, మరో వైపు భయాన్ని కలిగిస్తోందన్నారు.

ఇక ఈ సినిమా కథకు అనుగుణంగా ‘ఉత్తమ విలన్ ’ అనే పేరును కమల్ కి సూచించాని త్వరలో షూటింగు ప్రారంభించబోతున్నట్లు తెలిపారు. నటుడిగా ఎన్నో అవార్డులు అందుకున్న కమల్, విలన్ గా మంచి పేరు తెచ్చుకుంటాడనటంలో ఎటువంటి సందేహం లేదు.