ఓటర్ల చేతికిక తిరస్కార బాణాలు

Posted: 09/27/2013 01:11 PM IST

Rejection option for voters now sc orders

దేశంలో ఈ మాత్రం పరిస్థితులున్నాయంటే అది కేవలం న్యాయ వ్యవస్థ చలువ వలనేనని నమ్మేవాళ్ళు దేశంలో అధిక సంఖ్యలో ఉన్నారు. రాజకీయ ప్రయోజనానికే పెద్ద పీట వేసే ప్రభుత్వం దారి తప్పుతున్నదని తెలిసినప్పుడల్లా న్యాయస్థానాలు కలుగజేసుకుని పరిస్థితిని చక్కదిద్దటానికి ప్రయత్నిస్తున్నాయి. అలా కాకుండా పూర్తిగా న్యాయస్థానాలు కూడా తమ కింది పనిచేసేట్టుగా ఎన్నో రకాల బిల్లులను ప్రవేశపెట్టటానికి ప్రభుత్వం లోగడ యోజనలు చేసింది.
2జి స్పెక్ట్రమ్ విషయంలో తప్పు జరిగిపోయిందని నాలిక కరుచుకుంటూనే తాత్సారం చేస్తున్న ప్రభుత్వం, ప్రభుత్వ నియామకాలను సుప్రీంకోర్టు రద్దు చెయ్యటంతో బిత్తరపోయింది. ఎన్నో సందర్భాలలో కోర్టుల నుంచి ప్రభుత్వం పట్ల నిరసన వ్యాఖ్యలు కూడా వచ్చాయి.
తాజాగా నేరచరిత ఉన్నవాళ్ళ ఆటలను రాజకీయరంగంలో కట్టించటానికి నడుం బిగించిన సుప్రీం కోర్టు, అవినీతి నేతలను ఎన్నికలలో పోటీ చెయ్యకుండా ఉండటమే కాదు, ఎన్నికలలో గెలిచినవాళ్ళ మీద కూడా వేటు వేసింది. ప్రజాప్రతినిధుల మీద క్రిమినల్ కేసులు నిరూపితమై, కనీసం రెండు సంవత్సరాల శిక్ష పడ్డట్లయితే అటువంటి వాళ్ళు అనర్హులవుతారని కూడా తెలియజేయటంతో దాన్న జీర్ణించుకోలేకపోయిన ప్రభుత్వం వెంటనే నేర చరితగలవాళ్ళు కూడా ఎన్నికలకు అర్హులేనని అంటూ బిల్లుని పార్లమెంటులో ప్రవేశెపెట్టే ప్రయత్నం చేసి భంగపడింది. ప్రతిపక్షాలు అందుకు ఒప్పుకోలేదు.
అయినా పట్టు విడవని కేంద్ర ప్రభుత్వం ఆ దిశగా ఆర్డినెన్స్ ని పాస్ చెయ్యటం జరిగింది. దాని మీద రాష్ట్రపతి సంతకం పెడితే చాలు, సుప్రీంకోర్టుని ధిక్కరించకుండానే పనులు చేసుకోవచ్చనుకుంది కేంద్ర ప్రభుత్వం. దానితో ప్రతిక్షాలు రాష్ట్రపతికి ఆ పని చెయ్యవద్దని, ప్రభుత్వ చర్య రాజ్యాంగ విరుద్ధమైనదని అని విన్నపం చేసుకున్నాయి.
ఈ లోపులో సుప్రీం కోర్టు నుంచి మరో సంచలనాత్మకమైన తీర్పు వెలువడింది. అదేమిటంటే ఓటుని తిరస్కరించే హక్కు. ప్రస్తుతం ఎన్నికలబరిలోనున్న వారిలో ఎవరినైనా ఎన్నుకునే అవకాశం ఉంది కానీ తిరస్కార ఓటు ప్రజల చేతిలో మరింత శక్తిని పుంజుకునేదౌతుంది. దీని ద్వారా ఓటర్లు అభ్యర్థులను తిరస్కరించనూ వచ్చు. అప్పుడు మంచి వాళ్ళే ఎన్నికలలో నిలబడగలుగుతారని కోర్టు అభిప్రాయపడుతోంది. ఓటు వెయ్యటం చట్టబద్ధమైన హక్కైతే తిరస్కరించటం ప్రాథమిక హక్కు అని సుప్రీం కోర్టు తెలియజేసింది. దీనితో పారదర్శకత కూడ పెరుగుతుందని సుప్రీం కోర్టు ఉద్దేశ్యపడుతోంది.
-శ్రీజ