48 గంటల పాటు దిగ్బంధంలో తిరుపతి

Posted: 08/28/2013 09:08 AM IST

రాష్ట్ర విభజన నిర్ణయానికి వ్యతిరేకంగా 48 గంటల పాటు తిరుపతని అష్టదిగ్బంధనం చేసేందుకు ఉద్యమకారులు సమాయత్తం అయ్యారు. ఈ రోజు ఉదయం 9 గంటల నుంచి గురువారం సాయంత్రం 5 గంటల వరకు తిరుపతిలో ప్రవేశానికి, తిరుపతి నుంచి బయటకు వెళ్లటానికి వీల్లేకుండా రహదారులను ముట్టడించనున్నారు. తిరుమలకు వెళ్లే భక్తులకు, ద్విచక్ర వాహనదారులకు మాత్రం సడలింపులిచ్చారు. మరోవైపు చిత్తూరులోనూ మూడు రోజుల పాటు దిగ్బంధానికి ఐకాస పిలుపునిచ్చింది. తిరుపతిలో హోటళ్ల నిర్వాహకులు, వర్తక వాణిజ్య సంఘాలు, వ్యాపారులు, విద్యాసంస్థలు యాజమాన్యాలు రెండు రోజులు బంద్ కు సంపూర్ణ మద్దతు ప్రకటించాయి. బంద్ నేపథ్యంలో రైల్వే స్టేషన్ నుంచి భక్తులకు ఉచిత రవాణా సౌకార్యం సమకూర్చేందుకు తితిదే అంగీకరించినట్లు ఎస్సీ రాజశేఖర్ బాబు తెలిపారు. బస్సు ఎక్కిన ప్రతి భక్తుడికి ఆహార పోట్లాలను అందిస్తుంది. విమానాశ్రయంలో దిగిన భక్తులు తిరుచానూరు సర్కిల్ నుంచి చుట్టూ తిరిగి చెర్లోపల్లి , జూపార్కుల మీదుగా అలిపిరికి చేరుకోవచ్చు. చెన్నై బెంగళూరుల నుంచి వచ్చే వాహనాలు సైతం తిరుచానూరు సర్కిల్ నుంచి అదే మార్గంలో చేరుకోవచ్చు. విజయవాడ నుంచి తిరుమలకు వచ్చే వాహనాలను కరకంబాడి, లీలామహల్ సర్కిల్ మీదుగా అలిపిరికి వెళ్లేందుకు అనుమతిస్తారు. తిరుపతి పరిసరాల నుంచి తిరుమలకు వెళ్లే మార్గాల్లో ఉద్యమకారులు ఎలాంటి ఆటంకాలు కలించరని ఎస్పీ రాజశేఖర్ చెప్పారు.