రాష్ట్ర విభజన విషయంలో పడుతున్న పీటముడి

Posted: 08/14/2013 03:13 PM IST

సీమాంధ్రంతా రాష్ట్ర విభజన ప్రకటనతో అట్టుడికిపోతోంది.  సిడబ్లుసి తన ప్రకటనను ఉపసంహరించుకోవాలని, అంతవరకూ పోరాటం ఆగదని ఉద్యమకారులు వెల్లడి చేస్తున్నారు.

నిన్నటి నుంచి ఆంధ్ర ఎన్జీవో ఉద్యోగ సంఘం చేస్తున్న సమ్మెలో భాగంగా ఈ రోజు హైద్రాబాద్ సచివాలయంలో ఉద్యమకారులంతా కలిసి సహపంక్తి భోజనాలు చేసారు.  సీమాంధ్రలో బస్సులు ఎక్కడికక్కడ ఆగిపోవటం, రాష్ట్రానికి ఆదాయం తీసుకువచ్చే శాఖలలోని ఉద్యోగుల సమ్మె, వెరసి రాష్ట్రానికి, ఆర్ టి సి కి, ఎంతో నష్టాన్ని కలుగుజేస్తున్నాయి. 

వీటన్నిటితోపాటుగా చాలా కాలంగా లేని తెలంగాణా ఉద్యమం కూడా తలెత్తిందంటే రాష్ట్ర ప్రభుత్వానికి ఇక ఎడా పెడా మద్దెల దరువే.

అదే జరుగుతోంది.  ఈ రోజు తెలంగాణా ఉద్యోగ సంఘ నేతలు జలసౌధ లో ధర్నా చేసారు.  తెలంగాణా బిల్లును పార్లమెంటులో ఇంకా ఎక్కువ కాలాతీతం చెయ్యకుండా ప్రవేశపెట్టిమని వారి డిమాండ్. 

విద్యుత్ సౌధలో ఒకపక్క తెలంగాణా మరోపక్క ఆంధ్ర ఉద్యోగులు నిరసన చేపట్టారు.  ఆంధ్ర ఉద్యోగులకు మద్దతునిస్తున్న తులసిరెడ్డిని తెలంగాణా ఉద్యమకారులు అడ్డుకోగా పరిస్థితి ఉద్రిక్తంగా తయారైంది. 

అయితే, ఈ సమస్యను తీర్చటం ఎవరికి తరమా అని రాజకీయ విశ్లేషకులు ఆలోచిస్తున్నారు.  కరవమంటే కప్పకు కోపం, వద్దంటే పాముకు కోపమన్నట్లు, తెలంగాణా రాష్ట్రం కావాలని ఆ ప్రాంతం, రాష్ట్ర మంతా సమైక్యంగా ఉండాలని మిగతా ప్రాంతమంతా కోరుతుంటే, ఇరు ప్రాంతాలకూ న్యాయం చేస్తూ పరిష్కారం చెయ్యటం ఎవరికీ సాధ్యం కాదు. 

ఇప్పటి వరకూ ఏదో ఒక ప్రాంతంలో ఉన్న ఉద్రిక్తతలతో ఎలాగో నెట్టుకొస్తున్న ప్రభుత్వానికి ఇక ఇరు ప్రాంతాలలోనూ ఒకేసారి ఉద్యమం మొదలౌతే ఏ నిర్ణయం తీసుకోలేక విషయానికి పీటముడి పడేట్టుంది.  లాగినకొద్దీ బిగుసుకుంటుందే కానీ పీటముడి వదులవదు. 

ఈ సందర్భంలో కాంగ్రెస్ పార్టీ తాను చెయ్యగలిగిందంతా చేస్తోంది.  అందులో ఒకటి తాత్సారం చెయ్యటానికి మార్గాలు వెదుక్కోవటం, రెండవది జరుగుతున్న సంక్షోభానికంతా కారణం తెలుగు దేశం పార్టీ మీద కానీ లేదా దివంగత నేత వైయస్ ఆర్ మీద కానీ, వీలయితే ఇరువురి మీదా వెయ్యటం కానీ చేస్తుంది.  అయినా ఈ సంక్షోభంలో కాంగ్రెస్ పార్టీ కాబట్టి తట్టుకుంటోంది.  ఇతర పార్టీలెవరైనా ఈ స్థితిలో ఉంటే కాంగ్రెస్ ఒత్తిడికి తట్టుకోలేక పోయేవారు.

-శ్రీజ