Posted: 02/10/2013 03:00 PM IST

బీజేపీకి గత కొంత కాలంగా కష్టాల మీద కష్టాలు వచ్చి పడుతున్నాయి. ఒక ప్రక్క కర్ణాటక ప్రభుత్వలో ఒడిదొడుకులు ఎదుర్కొంటున్న బీజేపీ అధినాయకత్వానికి ఇప్పుడు మన రాష్ట్రంలో కూడా ఓ సమస్య వచ్చి పడింది. అదే రాష్ట్ర అధ్యక్ష పదవి సమస్య. ఇప్పటి వరకు పార్టీ అధ్యక్షుడిగా కొనసాగుతున్న అంబర్ పేట ఎమ్మెల్యే కిషన్ రెడ్డి ఈసారి తనను రాష్ట్ర అధ్యక్ష పదవి నుండి తప్పించాలని స్వచ్చందంగా కోరడంతో పార్టీ అధిష్టానం ఎప్పుడు ఎవర్ని ఎంపిక చేయాలా అని మల్లగుల్లాడు పడుతుంది. కొత్త అధ్యక్షుడి కోసం పార్టీ నేతల అభిప్రాయాలను తెలుసుకునేందుకు పార్టీ రాష్ట్ర కార్యాలయంలో జాతీయ ఉపాధ్యక్షుడు పురుషోత్తం, జాతీయ కార్యనిర్వాహక కార్యదర్శి సతీష్‌జీ రాష్ట్ర నేతలతో సమావేశమై సమావేశమయ్యారు. ఈ సందర్భంగా రాష్ట్ర నేతలు ఎవరికివారే భిన్నాభిప్రాయలు వ్యక్తం చేసినట్లు సమాచారం. రాష్ట్ర నేతల్లో ఏకాభిప్రాయం కొరవడటం, ప్రస్తుత అధ్యక్షుడు కిషన్‌రెడ్డి తనకు పదవి వద్దని చెప్పడంతో జాతీయ నేతలు ఈ విషయంలో నిర్దిష్ట అభిప్రాయానికి రాలేకపోతున్నారు. రాష్ట్ర నేతలు తనకు సహకరించడం లేదని కిషన్ రెడ్డి పెద్దల దగ్గర వాపోయినట్లు విశ్వసనీయ సమాచారం. 

మాజీ ఎంపీ జంగారెడ్డి, బద్దం బాల్‌రెడ్డి వంటి నేతలు తెలంగాణకు, సీమాంధ్రకు వేర్వేరుగా కమిటీలను ఏర్పాటు చేసి, ఇద్దరు అధ్యక్షులను ఎంపిక చేయాలని కోరినట్లు సమాచారం. పార్టీ రాష్ట్ర ఉపాధ్యక్షుడు చింతా సాంబమూర్తి, బద్దం బాల్‌రెడ్డి, రామచంద్రారావు తమకు ఈసారి రాష్ట్ర అధ్యక్షుడిగా అవకాశం కల్పించాలని కోరారు. పార్టీ జాతీయ కార్యదర్శి కె.లక్ష్మణ్ మాత్రం ఏ పదవి ఇచ్చినా ఇబ్బంది లేదని చెప్పినట్లు సమాచారం. ఇక విద్యాసాగర్‌రావు, దత్తాత్రేయ, ఇంద్రసేనారెడ్డి వంటి సీనియర్ నేతలు అధిష్ఠాన నిర్ణయానికే తమ ఓటని చెప్పినట్లు తెలిసింది. అన్ని అభిప్రాయాలను నివేదిక రూపంలో పార్టీ జాతీయ నాయకత్వానికి పరిశీలన కమిటీ అందజేసిన తరువాత , దాన్ని బట్టే తుది నిర్ణయం ఉంటుందని పార్టీ వర్గాలు అభిప్రాయపడుతున్నాయి. మరి అధిష్టానం కిషన్ రెడ్డినే ఒప్పిస్తుందా ? లేక కొత్త వారిని నియమిస్తుందా చూడాలి.